Rajendra Hagwane Arrest : राजेंद्र हगवणेला लपण्यासाठी कोणी मदत केली, सगळं बाहेर येणार! भावाचीही चौकशी

Vaishnavi Hagwane Case : वैष्णवी हगवणे आत्महत्या प्रकरणात फरार असलेले तिचे सासरे राजेंद्र हगवणे आणि दीर सुशील हगवणे यांना पोलिसांनी पहाटे साडेचार वाजता अटक केली आहे. या अटकेआधी तळेगाव परिसरातील हाॅटेलमध्ये ते जेवण करत असल्याचे व्हिडिओ समोर आला आहे. या व्हिडिओमध्ये ते मटनाव ताव मारत असल्याचे दिसते. हा व्हिडिओ नेमका कधीचा आहे हे स्पष्ट नाही. मात्र, पिता पुत्रांना पोलिसांचे कुठलेही भय नव्हते ते मोकाट फिरत असल्याचे दिसून येते.

मागील सात दिवसांपासून फरार असलेल्या राजेंद्र आणि सुशील हगवणे यांना लपण्यासाठी कोणी मदत केली याची देखील चौकशी पोलिसांमार्फत होणार आहे. कोणाच्या मदतीशिवाय हगवणे पिता पुत्र सात दिवस फरार असणे शक्य नसल्याचे सांगितले जात आहे. त्यामुळे हगवणे पिता पुत्राला मदत करणारे देखील पोलिसांच्या रडावर आहेत.पोलिसांनी राजेंद्र हगवणेच भाऊ संजय हगवणे याची देखील चौकशी केली आहे.

सुत्रांनी दिलेल्या माहितीनुसार, हगवणे पिता पुत्रांना पळून जाण्यासाठी मदत करणाऱ्यांची वाहने पोलिसांनी जप्त केली आहेत. ही वाहन बावधन पोलिस ठाण्यात ठेवण्यात आली आहेत. तसेच हागवणे पिता पुत्राला कोणा कडूनही मदत मिळणार नाही, याची दक्षता पोलिसांकडून घेण्यात आली. तसेच मदत करणाऱ्यांना पोलिसांनी ताब्यात देखील घेतले आहे.

महिला आयोग पाठपुरावा करणार

हगवणे पिता पुत्राच्या अटकेनंतर महिला आयोगाच्या अध्यक्षा रुपाली चाकणकर यांनी ट्विट करत म्हटले की, वैष्णवी हगवणे प्रकरणातील दोन्ही फरार आरोपी आज पोलिसांनी ताब्यात घेतले. या घटनेत पहिल्याच दिवशी राज्य महिला आयोगाकडून सुमोटो दाखल करण्यात आला होता.कायदा,सुव्यवस्था व प्रशासन त्यांचे काम उत्तमरित्या करत आहे.गुन्हा नोंद आहे,आरोपींवर कडक कारवाई होईल यासाठी राज्य महिला आयोग पाठपुरावा करत आहे.