Prashant Jagtap : प्रशांत जगतापांचा राजीनामा पक्षाने स्वीकारला? सुप्रिया सुळेंना 5 वेळा विचारलेल्या प्रश्नाचं एकाच वाक्यात उत्तर

Pune News : आगामी पुणे महापालिका निवडणुकीमध्ये दोन्ही राष्ट्रवादी काँग्रेस एकत्र येणार हे निश्चित होताच माजी महापौर प्रशांत जगताप यांनी राष्ट्रवादी काँग्रेस शरदचंद्र पवार पक्षाला रामराम केला आहे. त्यांनी त्याचा राजीनामा प्रदेशाध्यक्ष शशिकांत शिंदे यांच्याकडे पाठवून दिला. या राजीनाम्याबाबत प्रतिक्रिया देताना खासदार सुप्रिया सुळे यांनी जास्त बोलणं टाळलं असल्याचं पाहायला मिळालं आहे.

काही नगरपालिकांनंतर पुणे आणि पिंपरी-चिंचवड महापालिकेत दोन्ही राष्ट्रवादी काँग्रेस एकत्रित निवडणूक लढणार याबाबतच्या चर्चा सुरू झाल्या. पण राष्ट्रवादी काँग्रेस शरदचंद्र पवार पक्षाचे तत्कालीन शहराध्यक्ष असलेले प्रशांत जगताप हे सुरुवातीपासूनच या आघाडीबाबत अनुकूल नसल्याचे चित्र होतं. दोन्ही राष्ट्रवादी काँग्रेस एकत्र आल्यास आपण राजकारणातून काही दिवस संन्यास घेऊ असा इशारा त्यांनी पक्षाला दिला होता.

असं असलं तरी महानगरपालिका निवडणुकीच्या पार्श्वभूमीवर दोन्ही राष्ट्रवादी काँग्रेस एकत्र येणार बाबतच्या चर्चा आता अंतिम टप्प्यात आलेले आहेत. त्यामुळे कुठल्याही परिस्थितीत आता दोन्ही राष्ट्रवादी एकत्र येणार याबाबतचे संकेत प्रशांत जगताप यांना मिळाल्यानंतर त्यांनी पक्षाचा राजीनामा दिला आहे.

राजीनामा देण्यापूर्वी प्रशांत जगताप यांनी दोन दिवस मुंबई येथे जाऊन पक्षाच्या कार्याध्यक्ष आणि खासदार सुप्रिया सुळे यांची चर्चा केली होती. तब्बल 6 तास त्यांच्याशी चर्चा करून देखील प्रशांत जगताप यांनी आपला निर्णय बदलला नसल्याचे पाहायला मिळाल. त्यांनी बुधवारी सायंकाळी आपला राजीनामा प्रदेशाध्यक्षांकडे सोपवला आहे.

या राजीनाम्याबाबत पत्रकारांनी खासदार सुप्रिया सुळे यांना विचारला असता सुप्रिया सुळे यांनी प्रशांत जगताप यांना माझ्या शुभेच्छा आणि "रोज नई सुभह होती है". असे एका वाक्यामध्ये उत्तर दिलं. यानंतर 4 ते 5 वेळा वेगवेगळ्या पद्धतीने प्रशांत जगताप यांच्या राजीनाम्याबाबत सुप्रिया सुळे यांना पत्रकारांनी प्रश्न विचारण्याचे प्रयत्न केले. मात्र प्रत्येक वेळीस सुप्रिया सुळे यांनी "रोज नाही सुभह होती है असंच उत्तर दिल्याचं पाहायला मिळालं.

तसंच दोन्ही राष्ट्रवादी काँग्रेसच्या आघाडीबाबतच्या चर्चा सुरू असून या चर्चा अंकुश काकडे विशाल तांबे आणि वंदना चव्हाण हे करत असून अद्याप अंतिम प्रस्ताव माझ्याकडे आलेला नाही. जागांची वाटाघाटी होऊन ज्यावेळेस अंतिम प्रस्ताव आमच्याकडे येईल त्यानंतर त्याबाबत विचार करण्यात येईल असे देखील सुप्रिया सुळे यांनी स्पष्ट केलं आहे.