Pune Assembly Election 2024 : पुणे-लोणावळा दरम्यान होणार रेल्वे मार्गाचा विस्तार

पुणे : ‘‘पुणे रेल्वे स्थानकासोबत खडकी व शिवाजीनगर रेल्वे स्थानकांचे विस्तारीकरण करण्यात येईल. पुणे ते लोणावळादरम्यान सध्याच्या दोनऐवजी तीन ते चार मार्गिका करण्याच्या प्रस्तावाला राज्य सरकारने मान्यता दिली असून त्याचेही काम सुरु होईल.’’ अशी माहिती शिवाजीनगर मतदार संघातील महायुतीचे उमेदवार आमदार सिद्धार्थ शिरोळे यांनी दिली.

विधानसभा प्रचाराच्या निमित्ताने शिरोळे यांच्या पदयात्रेचे खडकीत आयोजन केले होते. यावेळी राजीव गांधी चौपाटी, डॉ. बाबासाहेब आंबेडकर पुतळा, राष्ट्रीय मित्र मंडळ, इंदिरा वसाहत, गवळी वाडा, दुर्गा वसाहत, पंकज मित्र मंडळ, इदगाह मैदान आणि राम मंदिर परिसरात शिरोळे यांनी पदयात्रा काढली होती.

जुन्या पुणे- मुंबई रस्त्याचे रुंदीकरण, खडकी-बोपखेल, बोपोडी-सांगवी यांना जोडणाऱ्या पुलाचे नव्याने बांधकाम, नदी सुधारणे अंतर्गत पाटील इस्टेट ते मुळा येथील नदीकाठचे सुशोभीकरण, नवीन सांडपाणी वाहिनीचे हाती घेतलेले काम यांसारखी अनेक कामे मार्गी लावण्यासोबतच खास खडकी कॅंटोन्मेंटमधील विकासासाठी राज्य सरकारकडून आणलेल्या १५ कोटी रुपयांच्या अतिरिक्त निधीमुळे नागरिकांचा शिरोळे यांना मोठा पाठिंबा मिळत आहे.

नागरिकांच्या समस्या समजून घेत त्यावर उपाययोजना राबविण्यासाठी मी कायमच त्यांच्यासोबत असतो आणि म्हणूनच खडकी कॅंटोन्मेंट बोर्डाच्या हद्दीतील प्रश्न सोडविण्याला मी कायमच प्राधान्य दिले आहे, असे शिरोळे यांनी सांगितले.

ते म्हणाले, ‘‘विद्यापीठ चौकातील दुहेरी उड्डाणपूल, पुणे मेट्रो, रस्त्यांचे रुंदीकरण, ४० दशलक्ष लिटर पाणी साठविले जाईल अशा आठ ठिकाणच्या पाण्याच्या टाक्या, आरोग्य सेवेसाठी एम्स संस्थेची उभारणी अशा अनेक विकास कामांचा समावेश खडकी मतदार संघात आहे.’’

आगामी काळात खडकी रेंज हिल्स येथील रेल्वे मार्गाखालील भुयारी मार्गाचे रुंदीकरण करण्यात येईल. केंद्र व राज्य सरकार मार्फत राबविण्यात येणारा ‘अमृत भारत’ हा प्रकल्प झाल्यानंतर रेल्वे गाड्यांची संख्या वाढेल; तसेच लोकल रेल्वेच्या फेऱ्याही वाढतील, अशी माहिती शिरोळे यांनी दिली.