Prashant Jagtap : शरद पवारांसमोर दोन्ही राष्ट्रवादींचा 'लेखाजोखा' सादर : पुण्यात नाराज प्रशांत जगतापांच्या मनासारखा निर्णय होणार

Pune News, 06 Dec : नुकत्याच पार पडलेल्या नगरपंचायत आणि नगरपालिकेच्या निवडणुकांमध्ये राज्यात विचित्र युती आघाड्या पाहायला मिळाल्या. यामध्ये काही ठिकाणी शरद पवार आणि अजित पवारांच्या राष्ट्रवादी काँग्रेसने एकत्रिक निवडणुका लढवल्या.

स्थानिकच्या या निवडणुकांप्रमाणेच आगामी पुणे महापालिकेच्या निवडणुकीत देखील दोन्ही राष्ट्रवादी एकत्र येणार असल्याच्या चर्चा सुरू झाल्या होत्या. मात्र, या चर्चा सुरू होताच शरद पवारांच्या राष्ट्रवादीचे शहराध्यक्ष प्रशांत जगताप यांनी दोन्ही राष्ट्रवादी एकत्र येणार असतील तर मी माझ्या पदाचा राजीनामा देईन आणि राजकारणातून बाहेर पडेन असा आक्रमक पवित्रा घेतला होता.

त्यानंतर आज प्रशांत जगताप यांनी राष्ट्रवादी काँग्रेस (शरद पवार) पक्षाचे सर्वेसर्वा शरद पवार यांची भेट घेतली. या भेटीनंतर त्यांनी आगामी पुणे महापालिका निवडणुकीत दोन राष्ट्रवादी एकत्र येणार नसल्याचं जाहीर केलं.

शरद पवारांच्या भेटीनंतर माध्यमांशी संवाद साधताना, आगामी पुणे महापालिका निवडणुकीत दोन राष्ट्रवादी एकत्र येणार नाहीत. शरद पवारांनी सगळ्यांना महाविकास आघाडी म्हणून लढायचं असं सांगितलं असल्याची माहिती जगताप यांनी दिली.

प्रशांत जगताप म्हणाले, 'आज शरद पवारांसोबत सविस्तर चर्चा झाली. पुणे महानगरपालिकेत कशी लढत राहील, आपण महाविकास आघाडी सोबत लढलो तर काय होईल, इतर लोकांसोबत युती केली तर काय होईल, याचा लेखाजोखा त्यांच्यासमोर मांडला.

यावेळी शरद पवारांनी पुण्यात आणि राज्यात आम्ही महापालिकेच्या निवडणुका महाविकास आघाडी म्हणूनच लढू असं सांगितलं.' तर जगताप यांनी शरद पवारांची भेट घेतल्यानंतर दिलेल्या माहितीमुळे आता मागील काही दिवसांपासून दोन्ही राष्ट्रवादी एकत्र येण्याच्या चर्चांना पूर्णवराम मिळाला आहे.