Pune Ganeshotsav 2025: विसर्जन मिरवणुकीचा वाद अखेर मिटला; 'या' मुद्द्यांवर झाली सहमती

Pune Ganeshotsav 2025: गणेश विसर्जन मिरवणुकीबाबत निर्माण झालेला वाद अखेर मिटला. मिरवणूक सकाळी साडेनऊ वाजता सुरू करून यंदाही परंपरेनुसार आणि दरवर्षीच्या क्रमाने मिरवणूक काढण्याचा निर्णय सर्व मंडळांकडून एकमताने घेण्यात आला. केंद्रीय राज्यमंत्री मुरलीधर मोहोळ यांनी मानाच्या मंडळांसह सर्व मंडळांची एकत्रित बैठक घेत यावर तोडगा काढला.

यंदा काही मंडळांनी नियोजित वेळेआधीच विसर्जन मिरवणुकीत सहभाग घेण्याचा निर्णय घेतला होता. त्यामुळे नवीन वाद निर्माण झाला होता. त्यावर केंद्रीय राज्यमंत्री मोहोळ आणि आमदार हेमंत रासने यांनी सर्व मंडळांची एकत्रित बैठक घेतली.

या संदर्भात मोहोळ म्हणाले, ‘‘पुण्याच्या सार्वजनिक गणेशोत्सवाच्या परंपरेची चर्चा जगभरात होत असते. देशभरातून हा उत्सव पाहण्यास भाविक मोठ्या संख्येने येतात. अशावेळी नवीन विषय समोर येणे हे पुण्याच्या सार्वजनिक गणेशोत्सवाच्या हिताचे नव्हते. याबाबत सर्व मंडळांच्या प्रतिनिधींशी चर्चा करत सामोपचाराने आणि एकमताने निर्णय घेण्यास यश आले आहे’’

पुण्यातील सार्वजनिक गणेशोत्सव मंडळे हा एक परिवार असून, प्रत्येकाची मते वेगवेगळी असू शकतात. मात्र, हा विषय चर्चेतून सोडवला जाऊ शकतो, यावर माझा विश्वास होता. म्हणूनच सर्वांनी एकत्रित येत हा विषय मार्गी लावला आहे. सामंजस्याची भूमिका घेणाऱ्या सर्व गणेशोत्सव मंडळांचे अभिनंदन, असंही यावेळी मुरलीधर मोहोळ यांनी म्हटलं आहे.

बैठकीत झालेले निर्णय :

- मिरवणूक परंपरेनुसार आणि दरवर्षीच्या क्रमानेच होणार

- सकाळी ९.३० वाजता मिरवणुकीस प्रारंभ होणार

- कोणतेही मंडळ स्थिर वादन करणार नाही

- मिरवणूक वेळेत संपविण्याची जबाबदारी सर्वच मंडळांवर

- दोन मंडळातील अंतर कमी करण्यासाठी प्रयत्न