Pune News: फडणवीसांकडून पुणेकरांची बोळवण! आश्वासन हवेतच विरले

Pune News: पुणे शहराच्या दृष्टीने वाहतूक कोंडी कमी करण्यासाठी कात्रज-कोंढवा रस्त्याचे रुंदीकरण होणे महत्वाचे आहे. मात्र भूसंपादन अभावी हे काम रखडले आहे. त्यामुळे रस्त्याच्या रुंदीकरणासाठी राज्य सरकारने अखेर २०० कोटी रुपयांचा निधी मंजूर केल्याची घोषणा केली आहे. पण, या घोषणेला आठ महिने होऊनही महापालिकेचे हात रिकामेच आहेत. कात्रज कोंढवा रस्त्यांचे काम कधी पूर्ण असा सवाल उपस्थित केला जात आहे.

कात्रज येथील राजस सोसायटी ते कोंढवा येथील खडी मशिन चौक या दरम्यान रस्ता रुंदीकरण करण्यात येणार आहे. या कामाला 31 ऑक्टोबर 2018 रोजी मान्यता मिळाली असून या भूसंपादन न झाल्याने रस्त्याचे काम रखडले आहे. या रस्त्यांच्या भूसंपादनासाठी 710 कोटी हवे आहेत. भूसंपादनामुळे दीर्घकाळ रेंगाळलेल्या या रस्त्याची रुंदी 84 ऐवजी 50 मीटर करण्याचा निर्णय महापालिकेने घेतला आहे.

रस्त्याची रुंदी कमी केल्याने भूसंपादनाचा खर्च 280 कोटी रुपये इतका येणार होता. यांपैकी 200 कोटी रुपये राज्य सरकारकडून मिळणार आहेत. हा निधी पुरवणी मागणीमध्ये मंजूर झाला आहे. परंतु,आठ महिने होऊनही अद्याप हे २०० कोटी रुपये पालिकेच्या तिजोरीत जमा झालेले नसल्याने रस्त्याचे काम ढेपाळले आहे.

कात्रज-कोंढवा रस्त्याचे काही प्रमाणात टीडीआर देऊन भूसंपादन झाले आहे. त्यामुळे हा रस्ता तुकड्या तुकड्यामध्ये तयार आहे. रस्त्यासाठी आवश्यक असलेल्या जागेच्या भूसंपादनाअभावी रस्त्याचे काम रखडले आहे. टीडीआरचे दर कमी झाल्यामुळे जागा मालकांकडून रोख रकमेची मागणी केली जात आहे. त्यामुळे या रस्त्याच्या भूसंपादनासाठी २०० कोटींच्या निधीची गरज आहे.

आठ महिन्यापूर्वी पुण्यातील एका कार्यक्रमात या रस्त्यासाठी २०० कोटी रुपयांच्या निधीला राज्य सरकारने मंजुरी दिल्याचे देवेद्र फडणवीस यांनी सांगितले होते. पण पालिकेला अद्यापपर्यत हा निधी मिळालेला नाही. हा निधी लवकरच महापालिकाला मिळेल, हे सांगून आता अधिकारीही त्रस्त झाले आहेत, मात्र निधी काही हातात पडलेला नाही.