Pune Election Result: सातव्यांदा नगरसेवक होण्याचे स्वप्न भंगले; माजी उपमहापौरांना महापालिका सभागृहाचा रस्ता बंद; भाजपने धूळ चारली

PMC Nivadnuk 2025: सलग सहा वेळा महापालिका निवडणूक जिंकणारे ज्येष्ठ नेते, आबा बागुल यांचे सातव्यांदा नगरसेवक होण्याचे स्वप्न भंगले आहे. एकनाथ शिंदे यांच्या शिवसेनेकडून आबा बागुल रिंगणात होते. या ठिकाणी भाजपचे महेश वाबळे हे तब्बल 4000 मतांनी विजयी झाले आहेत.

प्रभाग क्रमांक 36 मध्ये भाजपच्या चारही उमेदवारांचा मोठ्या मताधिक्याने विजयी झाला आहे. प्रभागातील उपमुख्यमंत्री एकनाथ शिंदे यांच्या शिवसेनेचे नेते आणि माजी उपमहापौर असलेल्या आबा बागुल यांना पराभवाचा धक्का बसला आहे.

प्रभागात दिग्गज माजी नगरसेवकांनी एकमेकांच्या विरोधात दंड थोपडले होते. भाजप उमेदवारचे महेश वाबळे यांनी आबा बागुल यांच्यात थेट लढत झाली. वाबळे यांची ही सलग दुसरी निवडणूक होती, वाबळे यांनी दुसऱ्या निवडणुकीत बाजी मारली आहे.

महेश वाबळे यांनी याच प्रभागातून 2017 मध्ये विजय संपादन केला होता. प्रभाग क्रमांक 36 हा पर्वती विधानसभा मतदारसंघात येतो आणि हा मतदारसंघ भाजपचा गड मानला जातो. लोकसभा, विधानसभा निवडणुकीमध्ये या ठिकाणी भाजपला मोठं मताधिक्य मिळालं होतं.

उपमुख्यमंत्री अजित पवार यांच्या राष्ट्रवादी काँग्रेसचे शहराध्यक्ष सुभाष जगताप आणि शरद पवारांच्या राष्ट्रवादी काँग्रेसच्या माजी स्थायी समिती अध्यक्ष अश्विनी कदम यांचाही या प्रभागात पराभव झाला आहे.

बागुल यांच्या शिवसेनेतील प्रवेशानंतर भाजपनेही त्यांच्यासमोर माजी नगरसेवक महेश वाबळे यांना उतरून तगडं आव्हान निर्माण केले होते. पर्वती विधानसभा मतदारसंघातून अपक्ष म्हणून बागुल यांनी निवडणूक लढल्यानंतर ते काँग्रेस पासून दूरच राहिले. काँग्रेसमध्ये प्रदीर्घ काळ सक्रिय असलेले आणि महापालिका सभागृह नेते असलेल्या आबा बागुल यांनी डिसेंबर २०२५ मध्ये एकनाथ शिंदे यांच्या शिवसेनेत प्रवेश केला.