Pune Rave Party: 'पुणे रेव्ह पार्टी'त मोठा ट्विस्ट; प्रांजल खेवलकरांवर नवे धक्कादायक आरोप; परप्रांतीय मुली, 28 वेळा हॉटेलचं बुकिंग...

Pune News : पुण्यातील खराडी येथील सुरू असलेल्या रेव्ह पार्टीवर पुणे पोलिसांनी छापा टाकून राष्ट्रवादी शरदचंद्र पवार पक्षाचे ज्येष्ठ नेते एकनाथ खडसे यांचे जावई प्रांजल खेवलकर यांच्यासह सात जणांना अटक केली होती. या प्रकरणी पोलिसांनी खेवलकर यांच्या फोनमधील आक्षेपार्ह व्हिडिओ आणि चॅटची माहिती सादर केली होती. आता पुणे रेव्ह पार्टीत (Pune Rave Party) मोठा ट्विस्ट आला आहे. आता खेवलकर यांच्यावर पुन्हा एकदा गंभीर आरोप करण्यात आल्यामुळे एकच खळबळ उडाली आहे.

पुण्यातील रेव्ह पार्टीतून राष्ट्रवादी काँग्रेस शरदचंद्र पवार पक्षाच्या महिला प्रदेशाध्यक्षा रोहिणी खडसे यांचे पती प्रांजल खेवलकर यांना अटक करण्यात आल्यामुळे हे प्रकरण राज्याचं आरोप-प्रत्यारोपांचं राजकारण तापलं आहे. सानवी बहुउद्देशीय सेवाभावी संस्थेनं राज्य महिला आयोगाकडे खेवलकर यांच्याविषयी गंभीर तक्रार केली आहे.

राज्य महिला आयोगाकडे केलेल्या तक्रारीत सानवी बहुउद्देशीय सेवाभावी संस्थेनं प्रांजल खेवलकर यांच्यावर खळबळजनक आरोप केले आहेत. यात प्रांजल खेवलकर यांनी परप्रांतीय मुलींना बोलावल्यासह 28 वेळा स्वत:च्या नावानं हॉटेल बुक केल्याचाही आरोप केला आहे.या आरोपांनंतर आता महिला आयोगानं मोठे निर्देश दिले आहेत.

महिला आयोगानं पुणे पोलिसांना पत्र पाठवून मानवी तस्करींविषयी केलेल्या आरोपींची चौकशी आणि कारवाईचे निर्देश दिले आहेत. पुणे पोलिसांनी केलेल्या छापेमारीत या रेव्ह पार्टीच्या ठिकाणी टेबलवर सिगारेटच्या पाकिटात अमली पदार्थ,दारूच्या बॉटल्स आढळल्या असल्याची माहिती समोर आली होती.

याचदरम्यान, पुणे पोलिसांनी प्रांजल खेवलकर यांच्या फोनमधून आक्षेपार्ह व्हिडिओ आणि चॅट आढळल्याचंही माहिती दिली होती. त्यात पोलिसांनी एका मुलीचा व्हिडिओ दुसऱ्या आरोपीला पाठवत ऐसा माल चाहिए असा संदेश पाठवल्याचेही सांगितले.

आमदार एकनाथ खडसे यांनी याबाबत प्रतिक्रिया दिली आहे. ते म्हणाले, जर ती खरी रेव्ह पार्टी असेल आणि त्या रेव्ह पार्टीत आमचे जावई गुन्हेगार असतील तर मी त्याचं समर्थन करणार नाही. परंतु, या प्रकरणात पोलिस यंत्रणेने प्रामाणिकपणे तपास करावा, अशी अपेक्षाही त्यांनी व्यक्त केली होती.