Pune Rave Party : डॉ. प्रांजल खेवलकरांबाबतचे गूढ वाढले; वैद्यकीय अहवालाबाबत रोहिणी खडसेंचा वेगळाच दावा

Pune, 28 July : पुण्यातील खराडीत एका पार्टीवर पोलिसांनी छापा टाकून माजी मंत्री एकनाथ खडसे यांचे जावई डॉ. प्रांजल खेवलकर यांच्यासह सात संशयितांना अटक करण्यात आली आहे. या सातपैकी दोघांनी अल्कोहोलचे सेवन केल्याचे पुढे येत आहे, त्यात डॉ. खेवलकर यांचा समावेश असल्याचे बोलले जात असून ससून रुग्णालयाने तसा अहवाल पोलिसांनी दिल्याचे सांगितले जात आहे. पण, डॉ. खेवलकर यांच्या पत्नी आणि राष्ट्रवादी काँग्रेस शरदचंद्र पवार पक्षाच्या महिला प्रदेशाध्यक्षा रोहिणी खडसे यांनी वेगळाच दावा केला आहे. त्यामुळे या रेव्ह पार्टीतील खेवलकरांबाबतचे गूढ वाढत चालले आहे

खराडीतील एका पार्टीवर टाकलेल्या छाप्यात सात जणांना अटक करण्यात आली होती. त्यात दोन महिला आणि पाच पुरुषांचा समावेश होता. त्या संशयित आरोपींमध्ये ॲड. रोहिणी खडसे (Rohini Khadse) यांचे पती डॉ. प्रांजल खेवलकर यांचाही समावेश आहे. छाप्यानंतर पोलिसांनी या सात आरोपीना अटक करण्यात आली होती. न्यायालयाने त्यांना दोन दिवसांची पोलिस कोठडी सुनावली आहे.

दरम्यान, या सात आरोपींपैकी दोघांनी अल्कोहोलचे सेवन केले होते, असा वैद्यकीय अहवाल (medical report) ससून रुग्णालयाने पोलिसांकडे सुपूर्त केला असल्याचे सांगितले जात आहे. मात्र, तो अहवाल कुटुंब म्हणून आम्हाला मिळाला नसल्याचा दावा रोहिणी खडसे यांनी केला आहे, त्यामुळे खेवलकरांच्या रेर्व्ह पार्टीतील ड्रग्ज अथवा अल्कोहोल सेवनाबाबत गूढ वाढत चालले आहे.

ॲड. रोहिणी खडसे म्हणाल्या, डॉ. प्रांजल खेवलकर यांचा वैद्यकीय अहवाल ससून रुग्णालयाकडून प्राप्त झाला आहे, अशा बातम्या माध्यमांतून प्रसिद्ध होत आहेत. मात्र, कुटुंब म्हणून आम्हाला तो अहवाल अजून प्राप्त झाला नाही. पण माध्यम प्रतिनिधींना तो अहवाल मिळाला आहे.

आम्हाला तो अहवाल मिळावा, यासाठी आम्ही पुणे पोलिसांकडे मागणी केली तर आम्हाला तो अहवाल थेट कोर्टात सादर केला जाणार आहे, असे सांगितले जात आहे. सध्या तो अहवाल माध्यम प्रतिनिधींना मिळाला आहे, असे आम्ही वृत्तवाहिनींमध्ये पाहत आहोत, असेही खडसेंनी म्हटले आहे.

त्या म्हणाल्या, माझी माध्यमांनाही विनंती आहे की, आपल्याला मिळालेला ससूनचा वैद्यकीय अहवाल आम्हाला द्यावा. जेणेकरून आम्हाला आमची बाजू मांडण्यास अहवाल उपयोगी ठरेल.