Pune Rave Party Raid: खडसेंच्या जावायानं दारुचं सेवनं केल्याचं स्पष्ट; 'ससून'चा अहवाल पुणे पोलिसांकडे

Pune News:राष्ट्रवादी काँग्रेस शरदचंद्र पवार पक्षाचे नेते, माजी मंत्री एकनाथ खडसे यांचे जावई आणि पक्षाच्या महिला प्रदेशाध्यक्ष रोहिणी खडसे यांचे पती डॉ. प्रांजल खेवलकर (Pranjal Khewalkar) रेव्ह पार्टी प्रकरणात मोठी अपडेट समोर येत आहे. खराडीतील रेव्ह पार्टी प्रकरणातील 7 आरोपीपैकी 2 जणांचे अल्कोहोल सेवन केल्याचे अहवालात स्पष्ट झाले आहे.

ससून रुग्णालयाने याबाबतचा अहवाल पुणे पोलिसांकडे दिला आहे. या कारवाईमध्ये मोठ्या प्रमाणात मद्य , अमली पदार्थ, हुक्का जप्त करण्यात आला असल्याचे सांगितले जात आहे. डॉ. प्रांजल खेवलकर यांच्यासह २ महिला आणि ५ पुरुष यांना अटक करण्यात आली आहे.

पुण्यातील खराडी परिसरात पुणे पोलिसांनी एका पार्टीवर रविवारी छापा टाकला होता. यात खडसेंचे जावाई प्रांजल खेवलकर यांना अटक करण्यात आली आहे. त्यामुळे राजकारण तापलं आहे.प्रांजल खेवलकरसह सातही आरोपींना न्यायालयाने दोन दिवसांची पोलिस कोठडी सुनावली आहे. आरोपींनी अमली पदार्थ सेवन केला होता की नाही, हे अद्याप समोर आलेले नाही. याबाबतचा अहवाल चार ते पाच दिवसांनी येणार आहे.

या प्रकरणावर रोहिणी खडसे यांनी समाज माध्यमावर पहिली प्रतिक्रिया दिली आहे. कायद्यावर व पोलिस यंत्रणेवर माझा पूर्ण विश्वास आहे. प्रत्येक गोष्टीला वेळ हेच उत्तर असतं. योग्य वेळी सत्य बाहेर येईल, असे त्यांनी आपल्या पोस्ट म्हटलं आहे. प्रांजल खेवलकरसह सातही आरोपींना न्यायालयाने दोन दिवसांची पोलिस कोठडी सुनावली आहे.

गेल्या काही दिवसांपासून भाजपचे मंत्री गिरीश महाजन आणि एकनाथ खडसे यांच्यात शाब्दीक युद्ध सुरु आहे. हनी ट्रॅप प्रकरणावरून महाजन आणि खडसे यांच्यात खडाजंगी सुरू आहे. या निमित्ताने या दोन्ही नेत्यांतील राजकारण तापले आहे. त्यांची धग त्यांच्या कुटुंबापर्यंत पोहचत असल्याचे दिसते.

सीडी बाहेर काढण्याची भाषा करणाऱ्या एकनाथ खडसे यांना कोंडी पकडण्याचा हा प्रयत्न आहे की खडसे यांचा जावई पकडला जाणे हा निव्वळ योगायोगा आहे, याबाबत उलटसुलट चर्चा रंगल्या आहेत.