Ravindra Dhangekar : 'या' प्रकरणात रवींद्र धंगेकर गोत्यात येणार, क्रिमिनल केस अन् दिवाणी दावा दाखल

Pune News, 19 Oct : पुण्यातील राजकीय वातावरण तापलं असताना उपमुख्यमंत्री एकनाथ शिंदे यांच्या शिवसेनेचे महानगर प्रमुख रवींद्र धंगेकर एका कायदेशीर प्रकरणामुळे गोत्यात येण्याची शक्यता आहे.

भाजप नेते चंद्रकांत पाटील यांच्या निकटवर्तीय असलेल्या व्यावसायिक समीर पाटील यांनी धंगेकर यांच्याविरुद्ध कोर्टात क्रिमिनल केस आणि दिवाणी दावा दाखल केला असून, यामुळे धंगेकर यांच्या राजकीय कारकीर्दीला धक्का लागण्याची शक्यता व्यक्त केली जात आहे. तसेच आता समोरासमोर होणारी लढाई कोर्टात गेली आहे.

गेले काही दिवस रवींद्र धंगेकर हे मंत्री चंद्रकांत पाटील यांच्यावर टीका करताना त्यांच्या अनुषंगाने सातत्याने समीर पाटील यांच्यावर गंभीर आरोप करीत आहेत. पुण्यातील कुख्यात गुंड निलेश घायवळ प्रकरणात बोलताना धंगेकर यांनी समीर पाटील यांच्यावर मकोका अंतर्गत कारवाई झाल्याचा आणि त्यांचा गुंडांशी साटेलोटे असल्याचा दावा केला होता.

यासाठी त्यांनी पुरावे म्हणून कथित फोटो आणि माहिती दिली होती. मात्र, या आरोपांचा कोणताही ठोस संदर्भ किंवा पुरावा नसल्याचा दावा करत समीर पाटील यांनी धंगेकरांची वक्तव्य राजकीय स्वार्थापोटी केलेले असल्याचे सांगितले. रवींद्र धंगेकर यांच्या या टीकेमुळे समीर पाटील यांच्या व्यवसायिक प्रतिमेला आणि वैयक्तिक आयुष्यात मोठा धक्का बसला असल्याचे पाटील यांनी पत्रकार परिषदेत सांगितले होते .

त्यानंतर 14 ऑक्टोबर रोजी समीर पाटील यांनी धंगेकर यांना अब्रुनुकसानीसाठी 50 कोटी रुपयांची नोटीस पाठवली होती. आता या नोटीशीनंतर पाटील यांनी पुणे जिल्हा न्यायालयात क्रिमिनल मानहानीचा खटला आणि दिवाणी दावा दाखल केला आहे. समीर पाटील यांनी पत्रकारांना सांगितलं की, "धंगेकर यांच्या आरोपांमुळे माझ्या व्यवसायाला मोठा फटका बसला आहे. राजकीय लाभासाठी माझी प्रतिमा खराब करण्याचा हा प्रयत्न आहे.

मी सर्व पुरावे न्यायालयासमोर मांडीन आणि धंगेकर यांना जबाबदार धरेल." जोपर्यंत दंगे कर माफी मागत नाही किंवा पन्नास कोटी देत नाही तोपर्यंत माघारी नाही." दरम्यान महायुतीमध्ये असून देखील महायुतीतील मित्रपक्षांवर रवींद्र धंगेकर हे सातत्याने टीका करत आहेत. याबाबत एकनाथ शिंदे यांनी दंगे बंद करा अशा सूचना दिल्यानंतर देखील धंगेकर थांबायला तयार नाहीत.

त्यामुळे महायुतीत मिठाचा खडा पडण्याची शक्यता असल्याने धंगेकर यांच्यावर पक्षांतर्गत कारवाई होण्याची देखील शक्यता आहे. तसेच याचा महापालिका निवडणुकीवर परिणाम होऊ शकतो. त्यामुळे अशा परिस्थितीत धंगेकर यांच्यावर राजकीय संकट येण्याची शक्यता असतानाच दुसरीकडे त्यांना कायदेशीर लढा देखील द्यावा लागणार आहे.