Pune ZP Election: 'अरे बाबा ऐक' म्हणत ... बंडोबांना थंड करण्यासाठी अजितदादा करताहेत मनधरणी

Pune News : पुणे जिल्हा परिषद आणि पंचायत समित्यांच्या निवडणुकीसाठी उमेदवारी अर्ज मागे घेण्याची शेवटची मुदत जवळ आल्याने राजकीय घडामोडींना वेग आला आहे. राष्ट्रवादी काँग्रेसचे दोन्ही गट (अजित पवार आणि शरद पवार) यांनी बहुतांश ठिकाणी संयुक्तपणे निवडणूक लढवण्याचा निर्णय घेतला असला तरी, पक्षाने अधिकृत उमेदवार दिलेल्या जागांवर अनेक बंडखोर उमेदवार मैदानात उतरले आहेत.

या बंडखोरांना थंड करण्यासाठी उपमुख्यमंत्री अजित पवार स्वतः मैदानात उतरले असून, ते थेट फोन करून बंडखोर उमेदवारांना अर्ज मागे घेण्याची विनंती करत आहेत. मिळालेल्या माहितीनुसार, अजित पवार यांनी अनेक बंडखोर उमेदवारांशी वैयक्तिकरित्या संपर्क साधला आहे. हा फोन करून अजित पवार अधिकृत उमेदवाराच्या बाजूने काम करण्याची, पक्षाच्या एकजुटीसाठी आणि विजयासाठी बंड मागे घेण्याची विनंती करीत आहेत.

"अरे बाबा मी काय सांगतो ऐक "पक्ष हा कुटुंबासारखा आहे, एकजुटीतूनच यश मिळते," असे संदेश ते फोनवर देत असल्याचे सांगितले जाते. विशेषतः बारामती, इंदापूर, दौंड, पुरंदर, मावळ, खेड, जुन्नर, शिरूर, हवेली आदी तालुक्यांमध्ये बंडखोरांना हे फोन केले जात आहे.

निवडणुकीच्या उमेदवारी प्रक्रियेत अर्ज भरण्याच्या शेवटच्या दिवसांपर्यंत राष्ट्रवादी काँग्रेस कडून उमेदवारीसाठी मोठी ओढाताण पाहिला मिळाली. यामुळे पक्षांतर्गत इच्छुकांची संख्या जास्त असल्याने काही ठिकाणी अधिकृत उमेदवारांविरोधात अपक्ष अर्ज केले आहेत.

मात्र, आता माघारीची मुदत संपण्यापूर्वी काही तास उरले असताना अजित पवार यांच्या वैयक्तिक हस्तक्षेपामुळे काही बंडखोर अर्ज मागे घेण्याच्या विचारात असल्याचे पक्षातील नेत्यांनी सांगितले.

गेल्या पंचवीस वर्षे राष्ट्रवादी काँग्रेसची पुणे जिल्हा परिषदेमध्ये निर्विवाद सत्ता आहे. या सत्तेला भाजपने यंदा आव्हान दिला आहे. अनेक इन्कमिंग घडून भाजप पुणे जिल्ह्यामध्ये आपलं वर्चस्व वाढवण्याचा प्रयत्न करत आहे. त्यात जर बंडखोरीचं ग्रहण लागलं तर मोठ नुकसान होऊ शकत त्यामुळे स्वतः अजित पवारच मैदानात उतरून हे बंडोबांना थंड करण्यासाठी प्रयत्न करत असल्याचा पाहायला मिळत आहे.