Purandar ZP Results : माजी आमदार संजय जगतापांना हाताशी धरत भाजपकडून विजय शिवतारेंच्या गडाला सुरूंग

Pune News, 10 Feb : पुणे जिल्ह्यात आलेल्या राष्ट्रवादी काँग्रेसच्या लाटेने मोठ्या राजकीय पक्षांसह अनेक नेत्यांची धुळधान झाल्याचं पाहायला मिळालं. अनेकांचे गड ढासळले, त्यामध्ये प्रामुख्याने पुणे जिल्ह्यातील उपमुख्यमंत्री एकनाथ शिंदेंच्या शिवसेनेचे आमदार विजय शिवतारे यांचा समावेश आहे.

विधानसभा निवडणुकीमध्ये विजय शिवतारेंनी एकीकडे दिवंगत उपमुख्यमंत्री अजित पवार यांचं आव्हान तर दुसरीकडे तत्कालीन काँग्रेसचे विद्यमान आमदार संजय जगताप यांच्या कडव्या झुंजीचा सामना करत विजय साकारला. कठीण परिस्थितीमध्ये साकारलेल्या शिवतारेंच कौतुक देखील झालं होतं.

त्यानंतर सातत्याने विजय शिवतारेंना त्यांच्या मतदार संघामध्ये पराभवाचे धक्के बसत असल्याचं पाहायला मिळत आहे. पुणे महापालिका निवडणुकांमध्ये देखील शिवतारेंनी एन्ट्री घेतली होती. पुणे महापालिकेच्या निवडणुकीबाबत झालेल्या शिंदेंच्या शिवसेनेच्या सर्व चर्चांमध्ये आणि तिकीट वाटपामध्ये शिवतारे आघाडीवर होते.

तसेच पुणे शहराच्या उपनगरांमध्ये त्यांनी ताकदही लावली होती. मात्र पुणे महापालिका निवडणुकीत शिंदेंच्या शिवसेनेचा सुपडा साफ झाला. त्यापूर्वी सासवड नगरपालिकेच्या निवडणुकीत देखील भाजपने त्यांना आसमान दाखवलं असल्याचं चित्र पाहायला मिळालं. काँग्रेसचे माजी आमदार असलेल्या संजय जगताप यांना भाजपने पुरंदर विधानसभा मतदारसंघातून पक्ष प्रवेश दिला आहे.

त्यानंतर ते सातत्याने शिवतारे यांच्यापुढे मोठे आव्हान निर्माण करत असल्याचे पाहायला मिळत आहे. नगरपालिकेच्या निवडणुकीत देखील भाजपने मुसंडी मारत इतिहासात पहिल्यांदाच सासवड नगरपालिकेवर आपला झेंडा फडकवला. तर पुन्हा एकदा जिल्हा परिषदेच्या आणि पंचायत समितीच्या निवडणुकीमध्ये भाजपने इतिहास रचला आहे.

ज्या मातीमध्ये भाजपला कधीही आपला उमेदवार विजयी करता आला नव्हता. त्या मातीमध्ये संजय जगताप यांच्या रूपाने भाजपने इतिहासात पहिल्यांदाच जिल्हा परिषद आणि पंचायत समितीमध्ये आपले उमेदवार निवडून आणले आहेत. उपमुख्यमंत्री एकनाथ शिंदे यांच्या पुण्यातील राजकारणामध्ये माजी मंत्री आणि सध्या आमदार असलेले विजय शिवतारे हे महत्त्वाचे मानले जातात.

मात्र शिवतरेंचा त्यांच्याच गडामध्ये होणारे एकामागून एक पराभव हे शिंदेंच्या सेनेसाठी चिंतेचा विषय बनले आहेत. पुरंदरमध्ये जिल्हा परिषदेच्या चार जागा येतात मागील निवडणुकीमध्ये शिवसेनेने चार पैकी तीन जागा जिंकल्या होत्या तसेच पंचायत समितीवर देखील आपली सत्ता आणली होती. यंदाच्या निवडणुकीमध्ये शिंदे यांच्या सेनेला चार पैकी एकही जागा जिंकता आलेली नाही. भाजप आणि राष्ट्रवादी काँग्रेसने प्रत्येकी दोन जागा जिंकल्या आहेत.

तसेच पंचायत समितीमध्ये राष्ट्रवादी काँग्रेसची सत्ता आली असून आठ पैकी चार जागा या राष्ट्रवादीच्या खात्यामध्ये असून भाजप दोन आणि शिंदेसेना दोन असंच चित्र सध्या पुरंदरचा पाहायला मिळत आहे. त्यामुळे पुरंदर पंचायत समितीवर राष्ट्रवादी काँग्रेसची सत्ता असणार हे निश्चित झालं आहे.