Ravindra Dhangekar News: चंद्रकांत पाटलांच्या एक पाऊल पुढे जात धंगेकरांची गौतमी पाटील अपघात प्रकरणात 'ही' मोठी मागणी

Pune News : पुण्यातील वडगाव बुद्रुक परिसरात लावणी नृत्यांगना गौतमी पाटीलच्या कारने रिक्षाला धडक देऊन भीषण अपघात झाला होता. त्यानंतर मंत्री चंद्रकांत पाटील यांनी डीसीपी संभाजी कदम यांना फोन करून त्वरित तपासाचे आदेश दिले होते. त्यानंतर आता माजी आमदार आणि उपमुख्यमंत्री एकनाथ शिंदे यांच्या शिवसेनेचे महानगरप्रमुख रवींद्र धंगेकर (Ravindra Dhangekar) यांनी एक पाऊल पुढे जात पोलिसांकडं मोठी मागणी केली आहे.

या प्रकरणाची माहिती घेण्यासाठी शनिवारी (ता.4) रवींद्र धंगेकर यांनी सिंहगड पोलीस ठाण्याला भेट दिली. तसेच या प्रकरणात कशाप्रकारे पोलिसांकडून कारवाई करण्यात येत आहे याबाबतची माहिती घेतली. त्यानंतर त्यांनी माध्यमांशी संवाद साधला.

रवींद्र धंगेकर म्हणाले, या प्रकरणांमध्ये योग्य तसा तपास होत नाही, असं निदर्शनास येत आहे. अपघातात गंभीर जखमी असलेले रिक्षाचालक आपली रिक्षा रस्त्याच्या बाजूला उभे करून त्यामध्ये बसले होते. अशा उभ्या असलेल्या रिक्षाला मागून येऊन धडक दिली, म्हणजे नक्कीच चालकाने मद्यप्राशन केलेल्या असावे.

अपघातानंतर त्या ठिकाणी क्रेनचालक कोणाच्या बोलावण्यावरून त्या ठिकाणी आला, तसंच स्थळावरून ती गाडी कशी हलवण्यात आली, या सगळ्या संशयास्पद गोष्टी आहेत. ज्या गाडीने अपघात झाला, ती गाडी गौतमी पाटील यांची आहे.

अपघात झाल्यामुळे एक व्यक्ती मरणाच्या दारात असताना नैतिकतेच्या दृष्टीने गौतमी पाटील (Gautami Patil) यांनी त्यांची भेट घेणं आवश्यक होतं. मात्र, तसं झालं नाही. या सर्व प्रकरणांमध्ये प्रकरण दाबण्याचा प्रयत्न करण्यात आला आहे. या दृष्टिकोनातून गुन्हा दाखल होणे आवश्यक आहे.

एक व्यक्ती मृत्यूच्या दारात असताना गौतमी पाटील या त्या कुटुंबाची भेट घेत नाही, त्यांचा उपचाराचा खर्च करत नाहीत. त्या उलट त्या जर इतरत्र त्यांचे शो करत असतील, तर हे अत्यंत दुर्दैवी आहे. सर्व प्रकरणाचा तपास करून गौतमी पाटील यांच्यावर देखील गुन्हा दाखल झाला पाहिजे. पाटील जर चुकीचं वागत असेल ,तर त्यांना कायद्याचा बडगा दाखवणे आवश्यक आहे. त्याला कुठेतरी पोलिसांकडून उशीर होत आहे, असा आरोप रवींद्र धांगेकर यांनी केला.