Gautami Patil Driver Accident : गौतमी पाटीलच्या मदतीला रोहित पवार धावले, चंद्रकांत पाटलांना म्हणाले, 'पोलिसांवर दबाव...'

Rohit Pawar News : नृत्यांगना गौतमी पाटील हिच्या ड्रायव्हरने एका रिक्षाचालकाला धडक दिल्याने तो गंभीर जखमी झाला आहे. मात्र, अपघातानंतर गौतमीचा ड्रायव्हर पळून गेला. रिक्षाचालकावर रुग्णालयात उपचार सुरू आहेत. मात्र, याची तक्रार मंत्री चंद्रकांत पाटील यांच्याकडे करण्यात आली. त्यांनी पोलिसांना फोन करत गौतमी पाटीलला उचलायचं की नाही, असे म्हटले. तसेच रिक्षाचालकाचा खर्च तिच्या कडून घ्या असे सांगितले.

हा अपघात झाला तेव्हा गौतमी पाटील त्या गाडीमध्ये नव्हती. त्यावरून आमदार रोहित पवार यांनी चंद्रकांत पाटलांना ट्विटवरून टॅग करत म्हटले की, गौतमी पाटील हिला मी ओळखत नाही, पण तिच्या गाडीमुळं रिक्षाचा अपघात झाला असेल तर निश्चितच त्याची चौकशी झाली पाहिजे, दोषी असेल त्यावर कठोर कारवाई झाली पाहिजे, त्या रिक्षावाल्या कुटुंबाला भरीव मदत मिळाली पाहिजे आणि जखमीचा वैद्यकीय खर्चही वसूल केला पाहिजे. पण अपघातग्रस्त गाडीत गौतमी पाटील नसताना तिला उचलण्यासाठी पोलिसांवर दबाव आणणं हे आपल्यासारख्या नेत्याला शोभणारं नाही.

'आपल्याविषयी माझ्या मनात आदर आहे, आपण संवेदनशील आहात. पण कार्यकर्त्यांचं किती ऐकायचं हेही आपण ठरवलं पाहिजे. महिला, गरीब, सामान्य माणूस यांना त्रास देणाऱ्या गुंडांना जेरबंद करण्यासाठी मंत्र्यांनी असे फोन केले तर राज्यात खऱ्या अर्थाने रामराज्य येईल.. पण गुंडांना पाठीशी घालून आणि निरपराधांना गुन्ह्यात गोवून मंत्री म्हणून आपण कोणता आदर्श घालून देत आहात?', असा सवाल देखील पवार यांनी पाटलांना विचारला.

'त्या' गुंडाच्या वेळी फोन का नाही?

कोथरुडमधील गुंड निलेश घायवळ हा परदेशी पळून गेला. त्यावरून देखील नाव न घेता रोहित पवार चंद्रकांत पाटलांना म्हणाले, 'तुमच्या मतदारसंघातला एक नामचीन गुंड भरदिवसा पोलिसांच्या डोळ्यात धूळ फेकून परदेशात पळून जातो, पण त्याच्या अटकेसाठी आपण कधी पोलिसांना फोन केल्याचं दिसलं नाही.'