Nilesh Ghaywal Case : 'बॉसशी काय बोलता धंगेकरांशी बोला...', म्हणत एकाकी पडलेल्या शिंदेंच्या नेत्याच्या मदतीला धावला शरद पवारांचा 'हा' आमदार

Pune News, 12 Oct : मागील काही दिवसांपासून गुंड निलेश घायवळ प्रकरणावरून राज्यातील राजकारण ढवळून निघालं आहे. राजकीय नेत्यांचा वरदहस्त असल्यामुळेच बनावट कागदपत्रांच्या आधार पासपोर्ट बनवून निलेश घायवळ परदेशात पळून गेल्याची टीका विरोधी पक्षाकडून केली जात आहे.

विरोधी पक्ष अशा प्रकारे टीका करत असताना मित्र पक्षातत असलेले माजी आमदार रवींद्र धंगेकर हे देखील भाजप नेत्यांवर सडकून टीका करताना पाहायला मिळत आहेत. मात्र धंगेकरांच्या या टीकेमुळे महायुतीमध्ये मिठाचा खडा पडत असल्याने याबाबत शिवसेनेच्या वरिष्ठांनी रवींद्र धंगेकरांचे कान टोचल्याचं सांगितलं जात आहे.

यानंतर रवींद्र धंगेकर यांच्याबाबत उपमुख्यमंत्री अजित पवार यांनी देखील वक्तव्य करत 'आपण काँग्रेसमध्ये नाही तर शिवसेनेत आहोत याचा धंगेकर यांना विसर पडला असावा', असा खोचक टोला लगावला. तर मुख्यमंत्री देवेंद्र फडणवीस यांनी देखील मी, धंगेकरांच्या बॉसशी बोलणार, असल्याची प्रतिक्रिया दिली.

त्यामुळे धंगेकर कुठेतरी आता एकाकी पडल्याचं चित्र निर्माण झालं आहे. ना त्यांच्या समर्थनार्थ त्यांच्या पक्षातील कोणी बोलत आहे. ना महायुतीतील अशा परिस्थितीत महाविकास आघाडीमधील राष्ट्रवादी काँग्रेस शरदचंद्र पवार पक्षाचे आमदार रोहित पवार त्यांच्या समर्थनार्थ मैदानात उतरले आहेत.

धंगेकरांबाबत बोलताना रोहित पवार म्हणाले. रवींद्र धंगेकर यांच्यासारखा सामान्य पुणेकर कसलीही भीडभाड न ठेवता गुन्हेगारांना हद्दपार करण्यासाठी लढत असेल तर उपमुख्यमंत्री आणि मुख्यमंत्र्यांना अडचण काय? सवाल त्यांनी उपस्थित केला आहे.

आपण कुठल्या पक्षात आहोत आणि त्यांच्या बॉसशी बोलू असली बेजबादार वक्तव्ये मोठ्या नेत्यांना शोभतात का? त्यांच्या बॉसशी बोलणार अशी धमकी देण्यापेक्षा गृहमंत्री या नात्याने धंगेकरांशी बोलून गुन्हेगारीचा नायनाट करायला काय हरकत आहे? असा प्रश्न रोहित पवार यांनी विचारला आहे.

मोठ्या नेत्यांच्या या प्रतिक्रिया ऐकून गुंडांचं मनोबल वाढणार नाही तर काय? हे असंच चालू राहिलं तर पुण्याच्या बरबादीला सरकारला जबाबदार का धरू नये? सोबत पुण्याच्या गुन्हेगारीची आकडेवारी देत असून ही आकडेवारी बघून तरी या नेत्यांचे डोळे उघडतील, अशी अपेक्षा त्यांनी व्यक्त केली आहे.