Sanjay Jagtap BJP entry : भाजप प्रवेश करताच काय मिळणार? संजय जगतापांनी केलीय 'बिगर हुंड्याची सोयरीक'

Pune News : पुणे जिल्हा काँग्रेसचे अध्यक्ष आणि माजी आमदार संजय जगताप यांनी सोमवारी सासवडमध्ये मेळावा घेत आपल्या भाजप प्रवेशाची घोषणा केली. 16 जुलै रोजी त्यांचा भाजपमध्ये प्रवेश होणार असून त्यापूर्वी त्यांनी पत्रकार परिषद घेत आघाडीच्या राजकारणावर गंभीर आरोप केले आहेत.

सासवडमध्ये आयोजित पत्रकार परिषदेमध्ये बोलताना संजय जगताप म्हणाले, 'मेळावा घेऊन कार्यकर्त्यांशी चर्चा केली. त्यानंतर 16 जुलै रोजी भाजप प्रदेशाध्यक्ष रवींद्र चव्हाण यांच्या उपस्थितीमध्ये भाजपमध्ये प्रवेश करण्याचा निर्णय घेतला आहे. सामान्यांचे प्रश्न आणि पुरंदर हवेलीचा विकास अधिक गतीने व्हावा, या दृष्टिकोनातून हा निर्णय घेण्यात आला आहे.'

भाजपमध्ये प्रवेश करताना मला कोणतेही पद हवे आहे, याबाबत चर्चा झालेली नाही. त्या उलट पुरंदर विधानसभा मतदारसंघामधील विकास कामांसाठी भरीव निधी देण्याचा आश्वासन मुख्यमंत्री देवेंद्र फडणवीस यांच्याकडून आपल्याला मिळाले आहे.

1980 पासून माझे वडील हे काँग्रेसशी (Congress) संलग्न आहेत. पूर्वी काँग्रेसमध्ये संघटनात्मक कार्य दिसत होते. मात्र, काही काळापासून त्यामध्ये कमी पाहायला मिळत आहे. कुठल्याही संघटनेमध्ये संवाद महत्त्वाचा असतो, मात्र त्या संवादाची कमतरता कुठेतरी काँग्रेसमध्ये जाणवत आहे. त्यामुळे तुलनेने चांगली संघटन असलेल्या भाजपमध्ये जाण्याचा निर्णय घेतला आहे.

भाजपमध्ये जाताना कोणताही वैयक्तिक अथवा पारिवारिक स्वार्थ माझा नाही. पक्ष प्रवेश करताना कोणतीही मागणी केली नसून जी भाजपसोबत सोयरीक ठरली आहे. ती बिगर हुंड्याची आहे. आगामी काळात भाजपकडून कोणतेही पद मी स्वीकारणार नसून थेट 2029 ची विधानसभा निवडणूक लढणार असल्याचा संजय जगताप यांनी सांगितले.

पुरंदर विधानसभा मतदारसंघांमध्ये सातत्याने विकास डावलण्यात आला आहे. आणि याला आघाडीचे राजकारण कारणीभूत राहिले आहे. 2024 च्या निवडणुकीमध्ये माझ्या पराभवाला देखील आघाडीचे राजकारण कारणीभूत ठरले असल्याचे संजय जगताप म्हणाले.

लोकसभा निवडणुकीनंतर आघाडीमध्ये फक्त सत्तेचे राजकारण झाले आणि त्यामुळेच विधानसभा निवडणुकीत पराभवाला सामोरे जावे लागले. लोकसभा निवडणुकीनंतर फक्त कोण मुख्यमंत्री होणार, कोण मंत्री कोण कोणाला काय मिळणार? याबाबत चर्चा करत राहिलो. बहुतेक जण फक्त वैयक्तिक सारख्याच याच गोष्टी करत होते. यामुळे आघाडीतील पक्षांमध्ये विसंवाद झाला आणि त्याचाच फटका विधानसभा निवडणुकीमध्ये बसला असल्याचे संजय जगताप यांनी सांगितले.

भाजपमध्ये (BJP) पक्षप्रवेश करण्याचा निर्णय घेतल्यानंतर कोणत्याही वरिष्ठ पातळीवरील काँग्रेसच्या नेत्याने आपल्याला संपर्क साधून थांबवण्याचा प्रयत्न केला नाही, असे देखील जगताप यांनी सांगितले. त्यामुळे भाजप प्रवेश कार्यक्रमादरम्यान ही काही खुलासे आपण करणार असल्याचे देखील जगताप म्हणाले.