Siddhrath Shirole : फिरायला, खेळायला मैदाने नाहीत; भाजप आमदाराचे विधानसभेत गाऱ्हाणे

Nagpur Winter Session : विद्येचे माहेरघर, सांस्कृतिक राजधानी अशी ओळख असलेल्या पुणे शहराचा विस्तार चारही दिशांना होत आहे. शहराची लोकसंख्या वाढत चालली आहे. वाढत्या नागरीकरणामुळे नागरिकांना सकाळी फिरण्यासाठी तसेच लहान मुलांना खेळण्यासाठी मैदानेच उपलब्ध नाहीत. त्यामुळे इच्छा असतानाही ज्येष्ठ नागरिकांना, मुलांना अडचणींना सामोरे जावे लागते. यावर तातडीने पावले उचलण्याची गरज असल्याचे भाजपचे आमदार सिद्धार्थ शिरोळे यांनी सांगितले.

पुणे शहरात अनेक शासकीय संस्था असून या संस्थांकडे मोठी मैदाने आहेत. ही मैदाने नागरिकांना फिरण्यासाठी तसेच लहान मुलांना खेळण्यासाठी उपलब्ध करून द्यावीत, अशी मागणी करत आमदार सिद्धार्थ शिरोळे (Siddhrath Shirole ) यांनी विधानसभेत आवाज उठविला. नागपूर येथे सुरू असलेल्या हिवाळी अधिवेशनात लक्षवेधी सूचना मांडून त्यांनी सभागृहाचे लक्ष वेधले.

शिवाजीनगर विधानसभा मतदार संघात (Shivajinagar constituency ) कृषी महाविद्यालय, पोलीस परेड ग्राऊंड, सीओईपी, औंध आयटीआय, पॉलिटेक्निक कॉलेज अशा मोठ्या शासकीय संस्था आहेत. या शासकीय संस्थांकडे असलेली मैदाने मोठ्या आकाराची आहेत. मात्र, त्यांचा वापर सर्वसामान्य नागरिकांना करता येत नाही. या संस्थांच्या निर्बंधांमुळे अशा मैदानावर सकाळी व्यायामासाठी येणाऱ्या नागरिकांना फिरण्यासाठी परवानगी नाकारली जाते.

मैदाने तातडीने खुली करावीत

शहरात सद्यस्थितीला अत्यंत कमी मैदाने राहिली आहेत. त्यातही नागरिकांना तेथे प्रवेश दिला जात नसल्याने नागरिक व्यायामासाठी जाणार कुठे? फिरण्याची सुविधा नसल्याने आरोग्याचा प्रश्न निर्माण होतो. विशेषतः ज्येष्ठ नागरिकांना हा प्रश्न अधिक भेडसावतो, अशी माहिती त्यांनी सभागृहासमोर मांडली. शहरातील सर्व शासकीय संस्थांची मैदाने नागरिकांना व्यायामासाठी व मुलांना खेळण्यासाठी उपलब्ध करून दिल्यास अनेक प्रश्न सुटतील. ही मैदाने तातडीने खुली करून द्यावी, अशी मागणीही आमदार शिरोळे यांनी केली आहे.