Sharad Pawar-Kalmadi News : कलमाडी रुग्णालयात, शरद पवार भेटीला; 1991 मध्ये पंतप्रधानपदासाठी लावली होती ‘फिल्डींग’, काय घडलं होतं?

Pune News : माजी केंद्रीय मंत्री आणि काँग्रेसचे ज्येष्ठ नेते सुरेश कलमाडी यांची प्रकृती खालावल्याने त्यांना पुण्यातील दीनानाथ मंगेशकर रुग्णालयात दाखल करण्यात आले आहे. गेल्या काही दिवसांपासून त्यांच्यावर येथे उपचार सुरू आहेत. यंदा त्यांनी सुरू केलेल्या पुणे फेस्टिव्हललाही ते उपस्थित राहू शकले नाहीत. काल पुणे दौऱ्यावर असलेले राष्ट्रवादी काँग्रेस (शरदचंद्र पवार) पक्षाचे नेते शरद पवार यांनी रुग्णालयात जाऊन कलमाडी यांच्या तब्येतीची विचारपूस केली.

राष्ट्रवादी काँग्रेसच्या कार्यकारणी बैठकीआधी पवारांनी थेट दीनानाथ मंगेशकर रुग्णालय गाठले. यावेळी डॉ. धनंजय केळकर यांनी कलमाडी यांच्या प्रकृतीबाबत पवारांना सविस्तर माहिती दिली. यावेळी मीरा कलमाडी, सुमिर कलमाडी, विठ्ठल मणियार, अंकुश काकडे उपस्थित होते.

पवार-कलमाडी मैत्री

शरद पवार आणि सुरेश कलमाडी यांची मैत्री राजकीय वर्तुळात नेहमीच चर्चेचा विषय राहिली आहे. त्यांच्या मैत्रीचे अनेक किस्से सांगितले जातात. वरिष्ठ पत्रकार रशीद किडवाई यांच्या ‘24 अकबर रोड’ या पुस्तकात या मैत्रीचा उल्लेख आहे. 1991 मध्ये राजीव गांधी यांच्या हत्येनंतर काँग्रेसमध्ये पंतप्रधानपदासाठी चुरस होती. नरसिंह राव, शरद पवार, अर्जुन सिंग आणि डॉ. शंकरदयाल शर्मा यांची नावे चर्चेत होती.

कलमाडींनी पवारांना पंतप्रधान करण्यासाठी आपली ताकद पणाला लावली होती. त्यावेळी सुरेश कलमाडी यांना एके काळी दिल्ली दरबारी 'लॅव्हीश' फाइव्ह स्टारमध्ये पार्ट्या आयोजित करणारे तरबेज नेते मानले जायचे. याचाच फायदा करून घेत कलमाडींनी दिल्लीत पंचतारांकित हॉटेलमध्ये नवनिर्वाचित काँग्रेस खासदारांसाठी भव्य डिनरचे आयोजन केले होते.

डिनरला 64 खासदारांनी हजेरी लावली होती. या घटनेने काँग्रेससह अनेक नेत्यांना धक्का बसला होता. अखेरीस नाट्यमय घडामोडींमुळे पवारांना पंतप्रधानपद मिळाले नाही, पण मित्रासाठी सर्वस्व पणाला लावणाऱ्या कलमाडींची चर्चा जोरदार झाली होती. यांसह दोघांच्या मैत्रीचे अनेक किस्से सांगितले जातात. काल कलमाडी यांच्या तब्येतीची विचारपूस करण्यासाठी शरद पवार रुग्णालयात गेल्यानंतर पुन्हा एकदा दोघांमधील मैत्रीच्या आठवणी जाग्या झाल्या आहेत.