NCP Politics : "शरद पवारांनी अजितदादांना समर्थन द्यावं..." राष्ट्रवादीच्या एकत्रिकरणाच्या चर्चांवर कृषीमंत्र्यांची मोठी प्रतिक्रिया

Nashik News, 27 May : दोन्ही राष्ट्रवादीच्या एकत्रि‍करणावर बोलताना राज्याचे कृषीमंत्री माणिकराव कोकाटे यांनी शरद पवारांनी आता अजितदादांच्या भूमिकेचे समर्थन करावे, अशी इच्छा व्यक्त केली आहे. शिवाय शरद पवारांनी अजित पवारांचं समर्थन केलं तर माझ्यासारख्या अनेक प्रामाणिक कार्यकर्त्याना आनंदच होईल, असंही त्यांनी म्हटलं आहे.

मागील अनेक दिवसांपासून दोन्ही राष्ट्रवादी एकत्र येणार का? या चर्चांना उधाण आलं आहे. राष्ट्रवादी शरद पवार गटाचे सर्वेसर्वा शरद पवार आणि राज्याचे उपमुख्यमंत्री अजित पवार हे मागील अनेक दिवसांपासून विविध बैठकांच्या निमित्ताने एकत्र येत आहेत.

शिवाय दोन्ही नेत्यांनी एकत्र येण्याबाबत सकारात्मक वक्तव्य देखील केली आहेत. त्यामुळे आता भविष्यात दोन्ही राष्ट्रवादी एकत्र येणार का याबाबतच्या चर्चा सुरू असतानाच कृषीमंत्री माणिकराव कोकाटे यांनी मोठं वक्तव्य केलं आहे.

माध्यमांनी राष्ट्रवादी एकत्र येण्याबाबत प्रश्न विचारला असता कोकाटे म्हणाले, "शरद पवार साहेबांनी 55 ते 60 वर्षे महाराष्ट्राच्या राजकारणात घालवली असून ते जेष्ठ नेते आहेत. मात्र, आता त्यांनी अजित पवार यांच्या भूमिकेचं समर्थन करावं. पवार साहेबांनी अजितदादांचं समर्थन केलं तर माझ्यासारख्या अनेक प्रामाणिक कार्यकर्त्याना आनंद होईल."

दरम्यान, यावेळी कोकाटे यांनी छगन भुजबळ उपमुख्यमंत्रीच काय तर पंतप्रधान देखील होऊ शकतात, असं म्हणत भुजबळांना टोला लगावला आहे. ते म्हणाले, नाशिकला पालकमंत्री देण्याचा अधिकार मुख्यमंत्र्यांचा आहे.

मुख्यमंत्री जो निर्णय घेतील तो आम्हाला मान्य असेल. भुजबळ उपमुख्यमंत्रीच काय ते पंतप्रधान झाले तरी मला चालतील. माझ्या मनात त्यांच्याबद्दल काहीही नाही." तर भुजबळांना मंत्रिपद दिल्यामुळे मराठा-ओबीसी वाद होणार नसल्याचंही त्यांनी यावेळी स्पष्ट केलं.