Vaishnavi Hagawane Case: वैष्णवी हगवणे मृत्यू प्रकरणाला नवे वळण; रूपाली चाकणकर यांनी दिली महत्त्वपूर्ण माहिती

Pune News: राष्ट्रवादी काँग्रेसचे पदाधिकारी असलेल्या राजेंद्र हगवणे यांची सून वैष्णवी हगवणे आत्महत्या प्रकरणाने संपूर्ण राज्याचे लक्ष वेधले आहे. या प्रकरणात आता राज्य महिला आयोगाच्या अध्यक्षा रूपाली चाकणकर यांनी नवी माहिती दिली आहे.

हे प्रकरण अजित पवारांच्या राष्ट्रवादीशी संबंधित असलेल्या नेत्याशी निगडित असल्याने या प्रकरणांमध्ये महिला आयोगाची भूमिका समोर येत नसल्याचं टीका विरोधकांकडून करण्यात येत होती. या पार्श्वभूमीवर महिला आयोगाच्या अध्यक्ष रूपाली चाकणकर यांनी समोर येत याबाबत काही खुलासे केले आहेत.

रूपाली चाकणकर म्हणल्या, काही दिवसांपूर्वी वैष्णवीची नणंद करिष्मा हगवणे हिने 6 नोव्हेंबर 2024 रोजी राज्य महिला आयोगाकडे आपला भाऊ व वहिनीविरोधात तक्रार दाखल केली होती. तक्रारीची गंभीर दखल घेत महिला आयोगाने केवळ एका दिवसात म्हणजेच 7 नोव्हेंबर रोजी पौड पोलीस ठाण्याला कारवाईसाठी आदेश दिले होते.

यावेळी , ही बाब कुटुंबांतर्गत असल्याने सामोपचाराने वाद मिटवण्याच्या दृष्टीने कौन्सिलिंग करण्याचे आदेश पोलिसांना देण्यात आले होते. त्यानुसार कौन्सिलिंग करून संबंधित वाद मिटवण्यात आला, अशी माहिती चाकणकर यांनी दिली.