Vaishnavi Hagawane : सर्वात मोठी अपडेट; राजेंद्र हगवणेला मदत करणं भोवलं, कर्नाटकच्या माजी मंत्र्याच्या मुलालाही पोलिसांनी उचललं

Pune News : पुणे शहरातील वैष्णवी हगवणे आत्महत्या प्रकरणी पोलिस कारवाईनं आता वेग पकडला आहे. या याप्रकरणी वैष्णवीच्या पती,सासू आणि नणंदेला सुरुवातीला अटक करण्यात आली होती. त्यानंतर फरार सासरे राजेंद्र हगवणे (Rajendra Hagawane) आणि दीर सुशील हगवणेला पहाटेच्यावेळी स्वारगेट परिसरातून बेड्या ठोकल्या होत्या. याप्रकरणी पोस्टमार्टेममध्ये धक्कादायक माहिती समोर आल्यानंतर पोलिसांनी कर्नाटकच्या माजी मंत्र्‍यांच्या मुलालाही अटक केली आहे.

मुळशी पोलिसांत गुन्हा दाखल झाल्यानंतर राजेंद्र हगवणे आणि सुशील हे पिता-पुत्र फरार झाले होते. या कालावधीत ते सात दिवस पुण्यापासून सातारा,कोल्हापूर,बेळगावपर्यंत मोकाट फिरत होता. याचवेळी आरोपी असलेल्या राजेंद्र हगवणे आणि त्यांच्या मुलाला आश्रय देणे आणि पळून जाण्यासाठी मदत करणं कर्नाटकच्या सीमावर्ती भागातील माजी मंत्री वीरकुमार पाटील यांचा मुलगा प्रीतम पाटील महागात पडलं आहे.

प्रीतम पाटीलसह अन्य पाच जणांना पोलिसांनी (Police) अटक केली आहे.अटक केलेल्या सर्व आरोपींना मंगळवारी (ता.26) न्यायालयात हजर केले जाणार आहे.फरार राजेंद्र हगवणे याला सीमा भागातील हेरिटेज हॉटेलला वास्तव्यासाठी ठेवले होते.दोन ते तीन दिवस राजेंद्र हगवणे याला प्रीतम पाटील यांनी मदत केल्याचा पोलिसांचा संशय आहे.

वैष्णवी हगवणेने 16 मे रोजी राहत्या घरात गळफास घेतला होता.यानंतर पोलिसांत वैष्णवीचे वडील आनंद कस्पटे यांनी दिलेल्या फिर्यादीनुसार,लग्नात 51 तोळे सोने,फॉर्च्युनर गाडी,चांदीची भांडी देण्यात आली. त्यानंतर लग्नाच्या दुसऱ्या दिवसापासून शशांक व तिचे सासू-सासरे यांनी घरातील किरकोळ कामाच्या वादातून तिच्याबरोबर भांडण सुरू केल्याचं म्हटलं आहे.

तर पिंपरी चिंचवड पोलिसांनी सोमवारी (ता.26) शशांक हगवणे, लता हगवणे आणि करिश्मा हगवणे यांच्या 7 दिवसांच्या पोलीस कोठडीची मागणी केली. न्यायालयाने पती शशांक सासू लता आणि नणंद करिष्मा या तिघांना 28 तारखेपर्यंत पोलीस कोठडी सुनावली आहे.