Indira Gandhi : जेव्हा पाकिस्तानी राष्ट्राध्यक्षाच्या 'त्या' कृत्याने इंदिराजींचा रागाचा पारा चढला! पुढे काय झाले?

Indira Gandhi Death Anniversary 2024: ‘आयर्न लेडी’ अशी ओळख असलेल्या भारताच्या पहिल्या महिला पंतप्रधान इंदिरा गांधी यांची आज पुण्यतिथी आहे. या निमित्ताने आज त्यांच्या कार्याचे स्मरण करताना पाकिस्तानशी संबंधित एक किस्सा सांगितला पाहिजे असाच आहे.

अंगरक्षकांनीच केली होती हत्या -

३१ ऑक्टोबर १९८४ या दिवशी अंगरक्षकांनीच इंदिरा गांधी(Indira Gandhi) यांची हत्या केली होती. १९६६ ते १९७७ आणि पुन्हा १९८० ते १९८४ पर्यंत अशा दोन मोठ्या कालखंडांत इंदिराजींनी देशाचे नेतृत्व केले. त्यांनी आपल्या निर्भय नेतृत्वाने देशात नवे मानदंड प्रस्थापित केले.

नेमके काय झाले? -

तर तो किस्सा असा आहे..! १९८० साली झिम्बाब्वेच्या स्वातंत्र्यदिनी इंदिरा गांधी यांना निमंत्रित करण्यात आले होते. तिथेच पाकिस्तानचे तत्कालीन राष्ट्राध्यक्ष जनरल झिया उल हक देखील उपस्थित होते. हरारेच्या हॉटेलमध्ये झिया उल हक यांनी इंदिरा गांधींना भेटण्याची इच्छा व्यक्त केली होती. या घटनेची नोंद भारताचे माजी परराष्ट्र मंत्री नटवर सिंह यांच्या 'वॉकिंग विथ लायन्स' या पुस्तकामध्ये आहे.

इंदिरा गांधी व झिया उल हक यांच्या चर्चेत विविध विषयांवर चर्चा झाली. यावेळी चेष्टेच्या स्वरात इंदिरा गांधी या झिया उल हक यांना म्हणाल्या की जग तुम्हाला लोकशाहीवादी म्हणते आणि मला हुकूमशहा!

दोन्ही नेत्यांच्या चर्चेनंतर झिया उल हक यांनी इंदिराजींना एक पुस्तक भेट दिले. परंतु त्या पुस्तकातील नकाशामध्ये काश्मीरचा भाग पाकिस्तानचा दर्शविल्यामुळे इंदिराजी प्रचंड संतापल्या. त्यांनी त्वरित नटवर सिंह यांना आदेश दिला की त्या पुस्तकासोबत एक तीव्र आक्षेप नोंदवून ते पाकिस्तानच्या परराष्ट्र मंत्रालयाला पाठवण्यात यावे.

या घटनेने केवळ द्विपक्षीय संबंधांची मर्यादा दाखवली नाही, तर इंदिराजींच्या तीव्रतेचा आणि परराष्ट्र धोरणातील ठाम भूमिकेचा आणखी एक नमुना इतिहासात नोंदवला गेला.

(Edited by - Mayur Ratnaparkhe)