Shivsena UBT Politics : अमित शाहांवर टीका पण मोदींना साॅफ्ट काॅर्नर, उद्धव ठाकरेंची रणनीती ठरली!

Shivsena UBT Politics : बाळासाहेब ठाकरेंच्या जयंती निमित्त आयोजित केलेल्या जाहीर सभेतून उद्धव ठाकरेंनी महापालिका निवडणुकीचे रणशिंग फुंकले. या सभेत विधानसभेतील परावभवाने आपण खचलो नसल्याचे दाखल ठाकरी शैलीतून भाजपवर जहरी टीका केली.

उद्धव ठाकरेंच्या टीकेच्या केंद्रस्थानी गृहमंत्री अमित शाह हे होते. त्यांनी अमित शाह यांची तुलना थेट औरंगजेबाशी केली. तसेच अमित शाहांनी महाराष्ट्रावर अडीच वर्ष घटनाबाह्य सरकार लादल्याचा आरोप केला.

मराठी माणसाच्या नादाला लागू नका. आम्ही औरंगजेबाला गाडलंय तर अमित शाह किस झाड कि पत्ती है? असे उद्धव ठाकरे म्हणाले. विशेष म्हणजे अमित शाह यांच्यावर टोकाची टीका करणाऱ्या उद्धव ठाकरेंनी पंतप्रधान मोदींवर जहरी भाषेत टीका करण्याचे सपशेल टाळले.

मोदींवर टीका करण्याचे टाळून आगामी महापालिका निवडणुकीत स्थानिक नेते आणि अमित शाह यांनाच टार्गेट केले जाणार असल्याची रणनिती उद्धव ठाकरेंची असल्याची चर्चा आहे.

पंतप्रधान मोदी यांची लोकप्रियता आजही लोकांमध्ये कायम आहे त्यामुळे त्यांच्यावर केलेल्या टीकेमुळे बुमरँग होण्याची शक्यता असल्याने मोदींवर जहीर टीका केली जाणार नसल्याची शिवसेना उद्धव बाळासाहेब ठाकरे पक्षाची रणनीती असण्याची शक्यता आहे.

हिंदुत्वाला साद

उद्धव ठाकरेंनी आपल्या भाषणातून जय श्रीराम म्हटल्यानंतर जय शिवराय म्हणावे लागेल असे म्हणत मराठी अस्मितेचा मुद्दा उपस्थित केला तसेच मी हिंदुत्व सोडले नसल्याचे सांगत भाजपने त्यांच्या पक्षातील झेंडातील हिरवा रंग काढून दाखवावा, असे म्हणत हिंदुत्ववादाला साद घालत विधानसभेला लांब गेलेल्या हिंदुत्ववादी मतांशी पुन्हा जवळीक साधण्याचा प्रयत्न केला.

आदित्य ठाकरेंच्या हातात नेतृत्व?

आगामी महापालिका निवडणुकीसाठी राज्यभर दौरे करणारा नेता उद्धव ठाकरेंना हवा आहे. ते स्वतः तब्बेतीच्या कारणाने संपूर्ण महाराष्ट्रभर फिरू शकत नसल्याची चर्चा होत असतात. त्यामुळे महापालिका निवडणुकीत शिवसेना उद्धव बाळासाहेब ठाकरे पक्षाकडून सेनापती म्हणून आदित्य ठाकरे मैदानात असण्याची शक्यता आहे. पडद्यामागून काम न करता मुंबई महापालिकेत आपल्या नेतृत्व दाखवून देतील.