Yogesh Kadam update : घाबरू नका... एकनाथ शिंदेंचं योगेश कदमांना अभय : सोबत जेवण करताना काय चर्चा झाली?

Mumbai news : राज्यातील वातावरण गेल्या काही दिवसापासून आरोप-प्रत्यारोपामुळे चांगलेच गाजत आहे. सत्ताधारी व विरोधकांकडून एकमेकांना लक्ष्य केले जात असल्याने वातावरण चांगलेच ढवळून निघाले आहे. दसरा मेळाव्याप्रसंगी एकनाथ शिंदे यांच्या शिवसेनेचे नेते व माजी मंत्री रामदास कदम यांनी शिवसेनाप्रमुख बाळासाहेब ठाकरे यांच्या निधनाविषयी खळबळजनक आरोप केले होते. त्यानंतर उद्धव ठाकरेंच्या शिवसेनेकडून कदम पिता-पुत्रांना टार्गेट करण्यात आले होते.

यापूर्वीच आईच्या नावे असलेल्या डान्सबारवरून योगेश कदम यांच्या समोरील अडचणी वाढल्या असतानाच आता गुंड निलेश घायवळ यांचा भाऊ सचिन घायवळ याच्या शस्त्र परवाना प्रकरणात योगेश कदम अडचणीत आले आहेत. गृहराज्य मंत्री योगेश कदम यांच्या सहीनंतर सचिन घायवळ याला शस्त्र परवाना मिळाल्याचा आरोप होताच, कदम यांनी उपमुख्यमंत्री एकनाथ शिंदे यांच्या 'मुक्तगिरी'वर जाऊन भेट घेतली. या भेटीवेळी शस्त्र परवाना वादात एकनाथ शिंदेंकडून त्यांना 'अभय' मिळाला आहे.

विरोधकांनी गृहराज्य मंत्री योगेश कदम (Yogesh Kadam) यांच्या सहीनंतर सचिन घायवळ याला शस्त्र परवाना मिळाल्याचा आरोप केला आहे. त्यामुळे आता विरोधकांनी सरकारवर जोरदार टीकेली झोड उठवली आहे, पुन्हा एकदा योगेश कदम यांच्या राजीनाम्याची मागणी होत आहे, विरोधकांकडून योगेश कदम यांच्या कोंडीचा प्रयत्न सुरू आहे. शिवसेना ठाकरे गट चांगलाच आक्रमक झाला आहे, त्यामुळे योगेश कदम यांच्या अडचणी वाढल्या असतानाच आता योगेश कदम यांनी उपमुख्यमंत्री एकनाथ शिंदे यांची शुक्रवारी सकाळी भेट घेतली.

योगेश कदम यांनी ठाण्यातील उपमुख्यमंत्री एकनाथ शिंदेंच्या 'मुक्तगिरी' या निवासस्थानी भेट दिली. यावेळी दोन तास पेक्षा अधिकवेळ कदम यांना ताटकळत ठेवण्यात आले होते. घायवळ यांना शस्त्र परवाना दिल्याने ते वादात अडकल्यानंतर त्यांनी एकनाथ शिंदे यांची भेट घेऊन कदम यांनी त्यांची बाजू मांडली. यावेळी एकनाथ शिंदे (Eknath shinde) यांनी योगेश कदम यांना दिलासा दिला आहे. समोर आलेल्या माहितीनुसार एकनाथ शिंदे हे योगेश कदम यांच्या पाठीशी आहेत. चुकीचे केले नसेल तर घाबरायचे कारण नाही, विरोधकांच्या टीकेला जशास तसे उत्तर द्या, असे एकनाथ शिंदे यांनी योगेश कदम यांंना सांगितल्याची माहिती सूत्रांकडून मिळत आहे.

योगेश कदम यांनी या प्रकरणानंतर आपली भूमिका एकनाथ शिंदे यांच्याकडे मांडली आहे. मुक्तागिरी बंगल्यावर योगेश कदम हे उपमुख्यमंत्री एकनाथ शिंदे यांना भेटण्यासाठी गेले होते, यावेळी एकनाथ शिंदे आणि कदम यांची भेट झाली. कदम यांच्यावरील आरोपांमुळे पक्षाची प्रतिमा मलिन होत असल्याचा पक्षातील नेत्यांमध्ये सूर असल्याची देखील माहिती समोर येत आहे. त्यामुळे एकनाथ शिंदे काय कारवाई करणार का ? याची उत्सुकता शिगेला पोंहचली असतानाच त्यांनी त्यांच्या कामाविषयी समाधान व्यक्त केले.

एकनाथ शिंदे यांच्या ठाण्यातील निवासस्थानी शिंदे आणि योगेश कदम यांच्यात जेवण करता -करता चर्चा झाली. दोन्ही नेत्यांमध्ये जवळपास 40 मिनिटे चर्चा झाली. जर चुकीचे काही केल नसेल तर घाबरू नका, विरोधकांना जशास तसे उत्तर द्या, अशा सूचना यावेळी शिंदे यांनी कदम यांना दिल्याची माहिती समोर येत आहे. त्यामुळे या प्रकारानंतरही योगेश कदम यांना पुन्हा एकदा अभय मिळाला आहे.