Amit Thackeray: अमित ठाकरेंच्या विरोधात उमेदवार न देता उद्धव ठाकरे 2019 ची परतफेड करणार?

Maharashtra Assembly Elections 2024: महाराष्ट्र नवनिर्माण सेनेचे अध्यक्ष राज ठाकरे यांचे पुत्र अमित ठाकरे हे अखेर माहीम विधानसभा निवडणुकीच्या रिंगणात उतरले आहेत. निवडणूक लढवणारे ते ठाकरे घराण्यातील दुसरे ठरले आहेत.

यापूर्वी माजी मुख्यमंत्री उद्धव ठाकरे यांचे पुत्र आदित्य ठाकरे यांनी 2019 मध्ये वरळी मतदारसंघातून निवडणूक लढवली होती. त्यावेळी आदित्य यांच्याविरोधात मनसेने उमेदवार दिला नव्हता. आता उद्धव ठाकरे आणि महाविकास आघाडी काय निर्णय घेणार, याकडे लक्ष लागले आहे.

प्रबोधनकार ठाकरे यांनी शिवसेनेचे नेतृत्व बाळासाहेब ठाकरे यांच्याकडे सोपवले होते. त्यानंतर बाळासाहेबांनी शिवसेनेची सूत्रे उद्धव ठाकरे यांच्या हाती दिली. राज ठाकरेही यासाठी दावेदार होते, मात्र उद्धव ठाकरे यांचे शिवसेनेते वर्चस्व वाढू लागले होते.

त्यामुळे पुढे काय होणार याचा अंदाज राज ठाकरे यांना आला होता. परिणामी, त्यांनी शिवसेनेतून बाहेर पडून पक्ष स्थापन केला. त्यांच्या पक्षाचे पहिल्याच निवडणुकीत 13 आमदार निवडून आले होते, मात्र ती लय राज ठाकरे यांना पुढे टिकवता आली नाही.

बाळासाहेब ठाकरे, उद्धव ठाकरे आणि राज ठाकरे यांनी निवडणूक लढवली नाही. बाळासाहेब हे अखेरपर्यंत किंगमेकरच्या भूमिकेत राहिले. उद्धव ठाकरे अनपेक्षितपणे मुख्यमंत्री झाले, पण त्यांनी विधानसभेची निवडणूक लढवली नाही. ते विधान परिषदेवर गेले. शिवसेना-भाजपची युती तुटल्यानंतर शिवसेना, काँग्रेस, राष्ट्रवादी काँग्रेसची महाविकास आघाडी स्थापन झाली.

मुख्यमंत्री शिवसेनेचाच होणार, असे ठरले होते. असे सांगितले जाते की, उद्धव ठाकरे यांनी मुख्यमंत्रिपद स्वीकारण्यास सुरुवातीला नकार दिला होता. मात्र काँग्रेस आणि राष्ट्रवादीतील दिग्गज नेते ठाकरे यांच्याशिवाय अन्य नेत्याला मुख्यमंत्री म्हणून स्वीकारण्यास तयार नव्हते. त्यामुळे उद्धव यांना मुख्यमंत्रिपद स्वीकारावे लागले होते.

आदित्य ठाकरे यांनी 2019 मध्ये वरळी मतदारसंघातून निवडणूक लढवली होती. त्या निवडणुकीत मनसेने त्यांच्याविरोधात उमेदवार दिला नव्हता. लोकसभेच्या निवडणुकीत राज ठाकरे यांनी महायुतीच्या उमेदवारांसाठी प्रचारसभा घेतल्या होत्या.

महायुतीला बिनशर्त पाठिंबा दिला होता. त्यामुळे अमित ठाकरे यांच्याविरोधात शिवसेना उमेदवार देणार नाही, असा अंदाज वर्तवला जात होता, मात्र तो खोटा ठरला. मुख्यमंत्री शिंदे यांनी शिवसेनेच्या 45 उमेदवारांची यादी काल रात्री उशीरा जाहीर केली. त्यात माहीम मतदारसंघातून विद्यमान आमदार सदा सरवणकर यांना उमेदवारी जाहीर करण्यात आली आहे.

आदित्य ठाकरे यांचा विजय सोपा व्हावा, यासाठी त्यांचे काका राज ठाकरे यांच्या पक्षाने माहीम मतदारसंघातून माघार घेतली होती. आदित्य यांना उद्धव ठाकरे यांच्या मंत्रिमंडळात त्यांना कॅबिनेट मंत्रिपद मिळाले.

आदित्य यांच्यापाठोपाठ अमित ठाकरे हेही आता माहीम मतदारसंघातून निवडणुकीच्या राजकारणात उतरले आहेत. माहीम मतदारसंघाचे प्रतिनिधित्व शिवसेनेचे सदा सरवणकर करतात. महाविकास आघाडीने उमेदवार दिला तर या मतदारसंघात तिरंगी लढत होणार आहे.

मनसे आणि शिवसेना यांच्यात काही जागांवर तडजोड होईल, असे सांगितले जात होते. मुख्यमंत्री शिंदे यांनी काही दिवसांपूर्वीच मुंबईतील टोलनाके बंद करण्याचा निर्णय घेतला. त्यानंतर या चर्चेला बळ मिळाले होते. मात्र मनसे आणि शिवसेनेचे जुळले नाही, असे दिसते. त्यामुळेच शिवसेनेने माहीम मतदारसंघात उमेदवार जाहीर केला आहे.

मुख्यमंत्री शिंदे यांनी विद्यमान आमदार सदा सरवणकर यांनाच रिंगणात उतरवले आहे. सरवणकर हे गेल्या दोन निवडणुकांत या मतदारसंघातून विजयी झाले आहेत. या मतदारसंघात शिवसेना उद्धव बाळासाहेब ठाकरे पक्ष काय भूमिका घेतो, राज ठाकरे यांनी 2019 मध्ये केलेल्या सहकार्याची उद्धव ठाकरे परतफेड करतात किंवा नाही, याबाबत आता उत्सुकता वाढीला लागली आहे.

राज्यात 1995 मध्ये शिवसेना -भाजप युतीची सत्ता आली. आधी मनोहर जोशी आणि नंतर नारायण राणे हे शिवसेनेचे दोन मुख्यमंत्री एकाच पंचवार्षिकमध्ये बनले. त्यानंतर युतीची सत्ता येण्यासाठी 2014 हे वर्ष उजाडावे लागले. काळ बदलत गेला, राजकारण बदलत गेले.

निवडणूक न लढवण्याचा बाळासाहेबांचा बाणा त्यांच्या पुढच्या पिढीने बाजूला सारला आणि आदित्य ठाकरे निवडणुकीच्या रिंगणात उतरले. आता अमित यांच्या रूपाने आणखी एक ठाकरे निवडणुकीच्या रिंगणात उतरले आहेत. मनसेच्या 16 सप्टेंबर रोजी आयोजित बैठकीत अमित ठाकरे यांनी विधानसभा निवडणूक लढवावी, अशी इच्छा स्वतः अमित आणि अन्य नेत्यांनी व्यक्त केली होती.