Raj Thackeray: राज ठाकरे पुन्हा महायुतीसोबत येतील; भाजपच्या नेत्याचं विधान चर्चेत

Raj Thackeray: राज्यात नुकत्यात २९ महापालिकांच्या निवडणुका पार पडल्या. या निवडणुकीत भाजपला घवघवीत यश मिळालं, भाजप तब्बल २४ महापालिकांमध्ये सर्वात मोठा पक्ष ठरला आहे. तर दुसरीकडं मुंबई महापालिकेच्या अत्यंत प्रतिष्ठेच्या निवडणुकीत भाजप जरी सर्वात मोठा पक्ष ठरला असला तरी दोन्ही ठाकरेंनी महायुतीला जोरदार टक्कर दिली. यामध्ये ठाकरेंना मराठी लोकांनी चांगली साथ दिली पण राज ठाकरेंना तेवढं यश मिळू शकलं नाही. पण लगेचच मनसेनं कल्याण-डोंबिवलीमध्ये शिंदेसेनेला साथ दिली, त्यामुळं मोठा गदारोळ झाला पण या कृतीमुळं राज ठाकरे हे पुन्हा महायुतीकडं येतील असा विश्वास भाजपच्या एका नेत्यानं व्यक्त केला आहे. याची सध्या चर्चा सुरु आहे.

राज ठाकरेंच्या मनसेनं कल्याण-डोंबिवलीत शिंदेंच्या शिवसेनेला पाठिंबा दिला आहे. यावर भाष्य करताना उपमुख्यमंत्री एकनाथ शिंदे म्हणाले, "राज ठाकरेंनी विकासाच्या मुद्द्यावर आम्हाला पाठिंबा दिला आहे. राज ठाकरेंचं ट्विट मी बघितलं छोटसं ट्वीट आहे. यामध्ये त्यांनी म्हटलं आहे की, वैयक्तिक स्वार्थासाठी मी कुठलाही निर्णय घेतला नाही आणि घेणारही नाही. त्यांनी नेहमी त्यांचा वैयक्तिक फायदा काय होईल, हे कधीही पाहिलं नाही. ते विकासाला महत्व देतात आणि पक्षाच्या कार्यकर्त्यांच्या भावनांची कदर करतात"

राज ठाकरेंच्या याच भूमिकेवर भाजपचे प्रवक्ते आणि नगरसेवक नवनाथ बन यांनी म्हटलं की, "खरंतर राज ठाकरे हे वैयक्तिक फायद्यासाठी कुठलीही भूमिका घेत नाहीत. याआधी देखील लोकसभेला त्यांनी भाजपला पाठिंबा दिला होता, आज त्यांनी कल्याण-डोंबिवलीत त्यांनी लवचिक भूमिका घेत महायुतीला पाठिंबा दिला. येणाऱ्या काळात राज ठाकरे हे आपले शत्रू कोण आहेत आणि मित्र कोण आहेत तसंच खरे भाऊ कोण आहेत? आणि भावाच्या नावावर आपल्या पाठीत खंजीर खूपसणारे कोण आहेत? हे ओळखतील आणि पुन्हा एकदा महायुतीच्यासोबत ते येतील अशी अपेक्षा आहे"

दरम्यान, कल्याण-डोंबिवली महापालिकेतील सत्तास्थापनेसाठी एकनाथ शिंदेंच्या शिवसेनेने वेगळाच डाव टाकला आहे. कोकणभवन इथं शिवसेनेच्या ५३ नगरसेवकांनी अधिकृत गट स्थापन केला. त्याचवेळी मनसेच्या पाच नगरसेवकांनीही स्वतंत्र गट स्थापन करीत थेट शिवसेनेला पाठिंबा जाहीर केला. त्यामुळे महापालिकेतील सत्ता समीकरणात शिंदेंचे पारडे अधिक जड झालं. या बैठकीला खासदार डॉ. श्रीकांत शिंदे आणि मनसेचे नेते राजू पाटील उपस्थित होते. बैठकीनंतर माध्यमांशी बोलताना डॉ. श्रीकांत शिंदे यांनी मनसेच्या पाठिंब्याची अधिकृत घोषणा करीत महायुतीचीच सत्ता ‘केडीएमसी’त स्थापन होणार असल्याचा दावा केला आहे, तर मनसेचे नेते राजू पाटील यांनी प्रसिद्धिमाध्यमांना सांगितले, की आम्ही शिंदेंच्या शिवसेनेला पाठिंबा दिला आहे.