Nanded BJP : खासदार प्रताप चिखलीकरांचे विरोधक चव्हाणांच्या गोटात?

Nanded News : प्रत्येक पक्षात गटबाजी असते, तशीच गटबाजी भारतीय जनता पक्षात नांदेडमध्ये दिसून येते. गेल्या काही महिन्यांतील वेगवेगळ्या घटनांमधून ती पुढे आली आहे. पक्षाच्या वरिष्ठ नेत्यांनी पुढाकार घेऊन ही गटबाजी थोपविण्याचा प्रयत्न केला. मात्र, खासदार प्रताप पाटील चिखलीकरांचे पक्षातील विरोधक आता अशोक चव्हाणांच्या गोटात सामील होण्याचे संकेत मिळत आहेत, त्यामुळे आगामी काळात अशोक चव्हाण व चिखलीकर ही सत्तेची दोन केंद्रे नांदेडमध्ये निर्माण होण्याची शक्यता आहे.

अशोक चव्हाणांच्या भाजप प्रवेशामुळे नांदेड जिल्ह्याचे राजकारण एका वेगळ्या वळणावर येऊन ठेपले आहे. भाजपत प्रवेश केल्यानंतर अशोक चव्हाण यांनी पक्षातील आजी-माजी आमदार खासदारांची बैठक घेऊन समन्वय निर्माण करण्याचा प्रयत्न केला आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

जिल्ह्यात भारतीय जनता पक्षाचे आमदार राम पाटील रातोळीकर, आमदार राजेश पवार, आमदार डॉ. तुषार राठोड, आमदार भीमराव केराम हे चार आमदार आहेत. या आमदारांचे आणि चिखलीकरांचे या ना त्या कारणाने खटके उडाले आहेत. काही महिन्यांपूर्वी झालेल्या पक्षाच्या बैठकीत चिखलीकर समर्थक म्हणून ओळखले जाणारे बालाजी बच्चेवार यांनी आमदार राजेश पवार यांच्यावर गंभीर स्वरूपाचे आरोप केले होते. पक्षाने बालाजी बच्चेवार यांच्यावर निलंबनाची कारवाई केली होती.

चिखलीकरांच्या काम करण्याच्या पद्धतीवर नाराज असलेले भारतीय जनता पक्षाचे ज्येष्ठ पदाधिकारी व कार्यकर्त्यांना अशोक चव्हाण यांचा भक्कम आधार मिळण्याची शक्यता आहे. तसेच, आजी माजी आमदार, खासदार, मंत्री, पदाधिकारी यांची अशोक चव्हाणांना साथ मिळणार आहे.

केंद्रात जर तिसऱ्यांदा भारतीय जनता पक्षाची सत्ता आली, तर मराठवाड्याला मंत्रिपद देण्यात येईल. अशावेळी अशोक चव्हाण यांच्या नावाला पसंती देण्याची शक्यता वर्तविण्यात येत आहे, त्यामुळे आत्तापासूनच अशोक चव्हाण यांच्याशी जुळवून घेतलेले बरे, अशा भूमिकेत आमदार व कार्यकर्ते आहेत.