Santosh Danve-Sanjana Jadhav : नागपूरच्या हिवाळी अधिवेशनात मामा, भाचा, बहिण-भाऊ अन् सौभाग्यवतीही..

Assembly Winter Session : नागपूरच्या हिवाळी अधिवेशनात सभागृहात सत्ताधारी अन् विरोधक यांच्यातील टीका, आरोप-प्रत्यारोपामुळे थंडीतही राजकीय वातावरण तापले आहे. या शिवाय अधिवेशनात चर्चा होतेय ती मंत्री, आमदारांच्या एन्ट्री आणि पेहरावाची. आता नव्याचे अशीच चर्चा होत आहे ती विधीमंडळ परिसरात झालेल्या मामा, भाचा, बहिण-भाऊ अन् सौभाग्यवतींची.

भाजपचे नेते माजी केंद्रीय राज्यमंत्री रावसाहेब दानवे यांचा राजकीय वारसा पुढे चालवणारे त्यांचे आमदार पूत्र संतोष दानवे, आमदार कन्या संजना जाधव यांच्यासोबत त्यांचा मुलगा आदित्यवर्धन आणि संतोष दानवे यांच्या होम मिनिस्टर रेणू दानवे यांची आज एकत्रित विधीमंडळ परिसरात एन्ट्री झाली. एकाच वेळी मामा-भाचा, बहिण-भाऊ आणि पती पत्नी सोबत आल्याने छायाचित्रकारांसाठी ही पर्वणीच ठरली.

अधिवेशन काळात कुटुंबातील सदस्यांनी विधीमंडळात कामकाज कसे चालते? निवडून दिलेले लोकप्रतिनिधी मतदारसंघाचे प्रश्न सभागृहात कसे मांडतात? हे पाहण्यासाठी उत्सुकतेने येत असतात. भाजपचे (BJP) आमदार संतोष दानवे हे भोकरदन-जाफ्राबाद विधानसभा मतदारसंघातून सलग तिसऱ्यांदा निवडून आले आहेत. फडणवीस सरकारने त्यांच्यावर पंचायत राज समितीचे अध्यक्ष म्हणूनही जबाबदारी सोपवली आहे.

या शिवाय दानवे यांच्या भगिनी संजना जाधव या कन्नड-सोयगाव विधानसभा मतदारसंघातून शिंदेच्या शिवसेनेकडून (Shivsena) पहिल्यांदा निवडून आल्या आहेत. शनिवारी नागपूरात त्यांच्यासोबत मुलगा आदित्यवर्धन हा देखील होता. मामा-भाचा, बहिण-भाऊ, पती-पत्नी या सगळ्यांना एकत्र पाहिल्यानंतर दानवे- जाधव यांच्या कुटुंबातील तिसरी पिढीही राजकारणात येणार का? अशी चर्चा सुरू झाली आहे.

आमदार संतोष दानवे यांच्या पत्नी रेणू दानवे या राजकीय घराण्याच्या सून असल्या तरी राजकारणापासून त्या अंतर राखून असतात. संतोष दानवे यांच्यासोबत राजकीय व्यासपीठावरही त्या फार दिसत नाहीत. विधानसभा निवडणुकीदरम्यान भोकरदन शहरात त्यांनी प्रचारासाठी काही गाठीभेटी घेतल्या होत्या, मात्र कौटुंबिक जबाबदारीलाच त्याचे अधिक प्राधान्य दिसून आले आहे. आज पहिल्यादांच त्या पती, भाचा, नणंद यांच्यासोबत नागपूर विधानभवनात आल्या होत्या.

संतोष दानवे यांच्या पंचायत राज समितीच्या कार्यालयाला या सगळ्यांनी भेट दिली. येथूनच रेणू दानवे, भाचा आदित्य जाधव यांनी विधिमंडळाचे कामकाज, अधिवेशनाची प्रक्रिया, समित्यांची भूमिका याबाबतची माहिती घेतली. या दानवे-जाधव यांच्या एकत्रित भेटीतून राजकीय ताकद, कौटुंबिक एकजूट आणि पुढील पिढीकडे जाणारा वारसा असे चित्र दिसले.