Andur ZP election : धाराशिवमध्ये काँग्रेसच्या माजी आमदारांसाठी कही खुशी कही मग : आलुरे गुरुजींचा पुतण्या पराभूत तर चव्हाणांच्या नातवाचा विजय

Dharashiv news : धाराशिव जिल्हा परिषदेतील मतमोजणी सोमवार सकाळपासून सुरु झाली. तुळजापूर तालुक्यात जिल्हा परिषदेचे 9 गट आहेत. त्यामध्ये भाजपला मोठा धक्का बसला आहे. जिल्हा परिषद निवडणुकीच्या तोंडावर विशेषतः जळकोट व मंगरूळ गटात ऐनवेळी काँग्रेसमधून भाजपमध्ये आलेल्या उमेदवारांना पराभवाचा धक्का बसला आहे. त्यामुळे आमदार राणाजगजीतसिंह पाटील यांचा बालेकिल्ला असलेल्या तुळजापूर तालुक्यात तीन गटात भाजपला धक्कादायकरित्या पराभव सहन करावा लागला आहे. विशेषतः अणदूर जिल्हा परिषद गटातून शिक्षण महर्षी व माजी आमदार सि. ना. आलुरे गुरुजी यांचे पुतणे व भाजपचे उमेदवार दीपक आलुरे पराभूत झाले.

अणदूर जिल्हा परिषद गटातील निवडणूक ही हायहोल्टेज ठरली. दोन मावस भावातील लढतीकडे संपूर्ण तालुक्याचे लक्ष लागले होते. या गटात भाजपचे उमेदवार दीपक आलुरे यांना उद्धव ठाकरे यांच्या शिवसेनेचे (Shivsena) उमेदवार डॉ. जितेंद्र कानडे यांच्याकडून पराभव स्वीकारावा लागला आहे. विशेषतः गेल्या आठ वर्षांपासून आमदार राणाजगजीतसिंह पाटील यांच्यासोबत असलेल्या दीपक आलुरे यांच्यासाठी हा पराभव जिव्हारी लागणार ठरला आहे. याठिकाणी क्रॉस व्होटिंगचा फटका भाजपच्या जिल्हा परिषद गटातील उमेदवार दीपक आलुरे यांना बसला आहे.

अणदूर पंचायत समिती गणातून माजी आमदार मधुकरराव चव्हाण यांचे नातू व भाजप (BJP) नेते सुनील चव्हाण यांचे चिरंजीव रणवीर चव्हाण विजयी झाले आहेत. रणवीर चव्हाण यांनी पंचायत समितीच्या या निवडणुकीतून राजकारणात एंट्री केली आहे. त्यामुळे येत्या काळात पंचायत समितीच्या सभापती निवडीत चुरस निर्माण होण्याची शक्यता आहे.

जिल्हा परिषद निवडणुकीच्या तोंडावर जळकोट येथील दोन वेळा जिल्हा परिषद सदस्य असलेल्या प्रकाश चव्हाण यांच्या पत्नी ज्योती चव्हाण यांनी ऐनवेळी भाजपमध्ये प्रवेश केला होता. याठिकाणी त्यांना काँग्रेसच्या प्रतीक्षा गोपाळ सुरवसे यांनी पराभूत केले.

त्यासोबतच मंगरूळ जिल्हा परिषद गटात काँग्रेसमधून ऐनवेळी भाजपमध्ये आलेल्या मुकूंद डोंगरे यांच्या नातेवाईक असलेल्या उमेदवाराला पराभवाचा धक्का सहन करावा लागला आहे. याठिकाणी समाजवादी पक्षाचे नेते देवानंद रोचकरी यांच्या कन्या विजयी झाल्या आहेत.