Aurangabad West Assembly Election 2024 Counting : औरंगाबाद पश्चिममध्ये शिंदेंचे शिलेदार संजय शिरसाट आघाडीवर

छत्रपती संभाजीनगर : छत्रपती संभाजीनगर विधानसभेच्या पश्चिम मतदार संघातून अपेक्षेप्रमाणे शिवसेना शिंदे गटाचे विद्यमान आमदार संजय शिरसाट हे सहाव्या फेरी अखेर 8335 मतांनी आघाडीवर आहेत. शिवसेना उद्धव बाळासाहेब ठाकरे पक्ष व महाविकास आघाडीचे राजू शिंदे यांच्याशी शिरसाट यांची थेट लढत होती.

महाराष्ट्र विधानसभा निवडणूक निकाल Latest Update

निवडणूक प्रचारा दरम्यान राजू शिंदे यांनी संजय शिरसाट (Sanjay Shirsat) यांना जेरीस आणल्यामुळे या मतदारसंघात वेगळा निकाल लागणार, अशी चर्चा गेल्या दोन दिवसांपासून मतदार संघात सुरू होती. आज प्रत्यक्ष मतमोजणीला सुरुवात झाली तेव्हा पहिल्या फेरीत राजू शिंदे यांनी संजय शिरसाट यांच्यावर 519 मतांची आघाडी घेतली. मात्र ही आघाडी शिंदे यांना पुढे टिकवता आली नाही.

महाराष्ट्रातील निकालाची प्रत्येक घडामोड - येथे क्लिक करा

त्यानंतरच्या सलग पाच फेऱ्यांमध्ये संजय शिरसाट यांनी राजू शिंदे यांच्यावरील आघाडी कायम ठेवली. संजय शिरसाठ यांची आघाडी सहाव्या फेरीपर्यंत सुरू होती. (Shivsena) छत्रपती संभाजीनगर जिल्ह्यातील शहरातील पूर्व, पश्चिम आणि मध्य या मतदारसंघांमध्ये महायुतीचे एकमेव संजय शिरसाट हे सध्या आघाडीवर आहेत.

सहाव्या फेरी अखेर संजय शिरसाट हे 8335 मतांनी आघाडीवर आहेत. संजय शिरसाट यांना पहिल्या फेरीत 5105, दुसरी फेरी ,10802 तिसरी फेरी 15447, चौथ्या फेरीत 20863, पाचवी फेरी 25708, तर सहाव्या फेरीत 29164 एवढी मते मिळाली.

तर त्यांचे प्रतिस्पर्धी महाविकास आघाडीचे राजू शिंदे यांना पहिली फेरी 5662, दुसरी फेरी 8239, तिसरी फेरी 10620, चौथी फेरी 13110, पाचवी फेरी, 16272 तर सहाव्या फेरीत 20829 एवढी मते मिळाली आहेत. तीन टर्म पश्चिम मतदारसंघातून शिवसेनेचे आमदार असलेले आणि चौथ्यांदा महायुतीकडून उमेदवारी मिळालेले संजय शिरसाट यांना शिवसेना उद्धव बाळासाहेब ठाकरे पक्षाकडून मोठे आव्हान देण्यात आले आहे.

2019 मध्ये झालेल्या निवडणुकीत भाजपच्या राजू शिंदे यांनी बंडखोरी करत अपक्ष निवडणुक लढवली होती. पण त्यावेळी यश न मिळालेल्या शिंदे यांनी आता उद्धव ठाकरेंच्या पक्षात थेट प्रवेश करत उमेदवारी मिळवली. पश्चिम मध्ये तुल्यबळ उमेदवार असल्याने इथे मैदानात तिसरा प्रबळ असा कुठला पक्ष नाही.