Ashok Kharat Solapur Connection : अशोक खरातचं सोलापूर कनेक्शन उघड; माजी आमदाराकडून खरातच्या मुलीला 32 लाखांचा फ्लॅट भेट

Mumbai, 31 March : नाशिकचा भोंदू अशोक खरात याचं सोलापूर कनेक्शन अखेर उघड झालं आहे. विविध क्लृप्त्या करून महिलांना आपल्या जाळ्यात अडकविणाऱ्या अशोक खरात याचे राजकीय नेते हे अनुयायी होते, हे आता लपून राहिलेले नाही. सोलापूर जिल्ह्यातील एका माजी आमदाराने आपल्या गावात पूजेसाठी आणल्याचे उघड झाले आहे, त्याबाबतचा गौप्यस्फोट शिवसेना उद्धव बाळासाहेब ठाकरे पक्षाच्या उपनेत्या सुषमा अंधारे यांनी केला आहे. त्यामुळे सांगोल्यात खळबळ उडाली आहे.

सांगोल्याचे माजी आमदार दीपक साळुंखे (Deepak Salunkhe) यांचे अशोक खरात याच्यासोबतचे व्यवहार हळूहळू पुढे येताना दिसत आहेत. अशोक खरात याच्या मुलीला ३२ किंवा ३४ लाख रुपयांचा फ्लॅट ‘गिफ्ट डीड’ केलेला आहे. या सर्वांचे धागेदारे आपल्याला सांगोल्यात सापडतील, असा दावा शिवसेना उद्धव बाळासाहेब ठाकरे पक्षाच्या उपनेत्या सुषमा अंधारे यांनी केला आहे.

त्या म्हणाल्या, अशोक खरात (Ashok Kharat) आणि इतर सर्व मंडळी ही सांगोल्यात पूजेला गेली होती. अनेक ठिकाणच्या पुजांना रुपाली चाकणकर आणि इतर मंडळी उपस्थित होती. ही सर्व मंडळी खरातचं प्रस्थ वाढविण्यासाठी प्रयत्न करत होती.

अशोक खरातच्या मंदिर आणि परिसराला 2018 मध्ये तत्कालीन पर्यटन मंत्री जयकुमार रावल यांच्या कार्याकाळात पर्यटनाचा दर्जा मिळाला होता. त्या दर्जामुळेच खरातच्या मंदिराला निधी आणि सुविधा या मिळाल्या होत्या, असाही दावा अंधारे यांनी केला आहे.

ईव्हीडब्ल्यू आणि गृहमंत्री या दोघांना भेटून या सर्वांचे पुरावे द्यायला मी तयार आहे. या संबंधांनी असणारी कागदपत्रे आणि धागेदारे सांगेाल्याचे दीपक साळुंखे यांच्यापर्यंत जातात. या सर्व लोकांच्या चौकशा झाल्या पाहिजेत, अशी मागणीही अंधारे यांनी केली.

हेमंत गोडसेंमुळे अशोक खरात अमित शाहांपर्यंत पोचला

लोकसभा निवडणुकीच्या वेळी हेमंत गोडसे यांना नाशिकमधून उमेदवारी मिळत नव्हती. पण, नाशिक लोकसभेची उमेदवारी आपल्यालाच मिळावी; म्हणून हेमंत गोडसे यांनी प्रायव्हेट चार्टर्डने अशोक खरात याला केंद्रीय गृहमंत्री अमित शाह यांच्याकडे नेले होते. त्यावेळचा अमित शाह यांच्यासोबत अशोक खरात याचा फोटो आहे. शाह यांच्याकडे अशोक खरात याला माजी खासदार गोडसे यांनीच नेले होते.

अशोक खरातशी आर्थिक संबंध आलेला नाही : दीपक साळुंखे

सुषमा अंधारे यांनी माझ्यावर चुकीचा आरोप केला आहे. अशोक खरात याच्याशी माझा कुठल्याही प्रकारे आर्थिक संबंध, व्यवहार अथवा फ्लॅट देण्याचा संबंध आलेला नाही. मी ३२ लाखांचे दिलेल्या घराची कागदपत्रं सुषमा अंधारे यांनी दाखवावीत. माझ्या सांगोला तालुक्यातील काही वैफल्यग्रस्त लोकांनी त्यांना ही चुकीची माहिती दिलेली असावी. अशोक खरातची कार्यक्रमाच्या निमित्ताने कधीतरी भेट झालेली असेल मी ते काही नाकारत नाही. पण त्याच्याशी कुठल्याही प्रकारचा आर्थिक संबंध आलेला नाही.