Sadabhau Khot : गोपीचंद पडळकरांबाबत बोलताना सदाभाऊ खोतांना अश्रू अनावर; म्हणाले, ‘रक्ताच्या शेवटच्या थेंबापर्यंत ह्या माणसासोबत राहणार...’

Sangli, 24 August : आमदार गोपीचंद पडळकर आणि आमदार सदाभाऊ खोत यांची दोस्ती संपूर्ण महाराष्ट्राला सर्वश्रूत आहे. एसटीच्या आंदोलनापासून अनेक विषयांवर या दोघांनी मिळून आवाज उठवला आहे. दोघेही आक्रमक भाषणासाठी ओळखले जातात. पण, ते जेवढी कठोर टीका करतात, तेवढेच ते दोघे एकमेकांविषयी किती हळवे आहेत, हे आज दिसून आले. आम्ही एकमेकांना साथ दिली नाही विरोध आम्हाला नवैद्यालाही शिल्लक ठेवणार नाहीत, त्यामुळे शेवटपर्यंत आम्ही एकमेकांच्या साथीने राहू, असे वचन सदाभाऊ खोत यांनी पडळकर यांच्या कार्यकर्त्यांसमोर बोलताना दिले.

सांगली जिल्ह्यातील एका धार्मिक कार्यक्रमात बोलताना आमदार सदाभाऊ खोत (Sadabhau Khot) यांना अश्रू अनावर झाले होते. आमदार पडळकर यांची साथ आपण शेवटपर्यंत सोडणार नसल्याचे खोतांनी निक्षून सांगितले. त्यामुळे वातावरणही काळी काळ भावनिक झाले होते.

‘शरीरात रक्ताचा शेवटचा थेंब असेपर्यंत मी आमदार गोपीचंद पडळकर (Gopichand Padalkar ) यांच्यासोबत राहणार आहे,’ हे सांगून पडळकर यांच्याबाबत बोलताना आमदार सदाभाऊ खोत यांना अश्रू अनावर झाले. आमदार गोपीचंद पडळकर यांना साथ दिली नाही, तर आम्हा दोघांनाही विरोधक नवैद्यालाही शिल्लक ठेवणार नाहीत, असेही खोत यांनी म्हटले आहे.

आमदार गोपीचंद पडळकर हे वंचित लोकांसाठी प्रस्थापितांच्या विरोधात कायम आक्रमक भूमिका घेत आहेत, म्हणूनच प्रस्थापितांचा पडळकर यांच्यावर राग आहे, असा हल्लाबोलही आमदार खोत यांनी केला आहे.

खोत म्हणाले, अनेक लोकांना वाटतं, गोपीचंद पडळकर हे आक्रमक बोलतात. आम्ही आक्रमक बोललं नाही तर हे लोक आम्हाला नवैद्यालाही शिल्लक ठेवणार नाहीत, हे मी तुम्हाला सांगतो. मग तुमचं कोण ऐकून घेणार? म्हणून आमदार गोपीचंद पडळकर यांच्यासाखं नेतृत्व आपण कायम जपूया.

मी बिरोबाच्या मंदिरात उभा आहे, बाळूमामांच्या समोर उभा आहे. मी तुम्हाला शब्द देतो की, ‘माझा रक्ताचा शेवटचा थेंब आहे, तोपर्यंत मी आमदार गोपीचंद पडळकर यांच्यासोबत राहणार आहे’, हे सांगताना मात्र आमदार सदाभाऊ खोत यांचा कंठ दाटून आला होता, त्यांना अश्रू अनावर झाले होते.