Satara Politic's : अजितदादांचा साताऱ्यात भाजपला दे धक्का; आमदार भोसलेंचे समर्थक माजी आमदारांचा पुतण्याच फोडला!

Karad, 23 August : स्थानिक स्वराज्य संस्थांच्या आगामी निवडणुकीसाठी उपमुख्यमंत्री अजित पवार यांनी जोरदार मोर्चेबांधणी सुरू केली आहे. मोठे नेते गळाला लावण्याचे प्रयत्न राष्ट्रवादी काँग्रेसकडून होताना दिसत आहेत. राष्ट्रवादी काँग्रेस मजबूत करण्यासाठी अजितदादांच्या राष्ट्रवादीने भाजपलाच जोरदार धक्का दिला आहे. सातारा जिल्ह्यातील भाजप आमदाराचे समर्थक असलेल्या माजी आमदाराच्या पुतण्याला राष्ट्रवादीने गळाला लावले आहे. उपमुख्यमंत्री अजित पवार यांच्या उपस्थितीत उद्या (ता. 24 ऑगस्ट) तो प्रवेश होणार असून ॲड. उदयसिंह पाटील-उंडाळकर यांच्यानंतर कऱ्हाड दक्षिणमधून आणखी एक बडा नेता राष्ट्रवादीत दाखल होत आहे. आगामी स्थानिक स्वराज्य संस्थांच्या निवडणुकीच्या पार्श्वभूमीवर हा प्रवेश महत्वपूर्ण मानला जात आहे.

माजी आमदार आनंदराव पाटील हे कऱ्हाड दक्षिणचे (Karad South) भाजपचे आमदार डॉ. अतुल भोसले यांचे समर्थक आहेत. पाटील यांचे पुतणे आणि कऱ्हाड शेती उत्पन्न बाजार समितीचे माजी उपसभापती सुनील पाटील हे उद्या (रविवारी) दहिवडीत राष्ट्रवादी कॉंग्रेस पक्षात प्रवेश करणार आहेत. पाटील यांच्या निर्णयामुळे कऱ्हाड दक्षिणमध्ये राष्ट्रवादी कॉंग्रेसची ताकद वाढणार आहे.

माजी मुख्यमंत्री पृथ्वीराज चव्हाण यांचे कऱ्हाड दक्षिणमधील कट्टर समर्थक माजी आमदार आनंदराव पाटील यांनी मागील विधानसभा निवडणुकीपूर्वी चव्हाण यांची साथ सोडून आमदार डॉ. अतुल भोसले (Atul Bhosale) यांच्यासोबत जाण्याचा निर्णय घेतला होता. त्यांच्यासेाबत त्यांचे पुतणे सुनील पाटीलही होते.

मध्यंतरी घडलेल्या काही राजकीय घडामोडींमुळे सुनील पाटील हे आपले काका आनंदराव पाटील यांच्यापासून दुरावले होते. बाजार समितीच्या निवडणुकीत त्यांनी शांत राहूनच ‘करेक्ट काम’ केले होते. त्यानंतर ते राजकीय घडामोडींपासून दूरच होते.

पक्षाचे अध्यक्ष अजित पवार यांच्या आदेशानुसार स्थानिक स्वराज्य संस्थाच्या निवडणुकीच्या दृष्टीने राष्ट्रवादी कॉंग्रेसचे मंत्री मकरंद पाटील, खासदार नितीन पाटील यांनी पक्षाची सातारा जिल्ह्यात ताकद वाढविण्यासाठी प्रयत्न सुरु केले होते. पाटील बंधूंनी पहिल्याच प्रयत्नात माजी सहकारमंत्री (स्व) विलासराव पाटील-उंडाळकर यांचे पुत्र ॲड. उदयसिंह पाटील-उंडाळकर यांना राष्ट्रवादीत आणले. त्यामुळे कऱ्हाड तालुक्यात राष्ट्रवादी काँग्रेसला एक भक्कम गट आणि नेता मिळाला. त्यानंतर पाटील यांनी नाराजांचा शोध सुरू केला.

माजी आमदार आनंदराव पाटील याचे पुतणे सुनील पाटील यांना मंत्री मकरंद पाटील यांनी गळाला लावले. उपमुख्यमंत्री अजित पवार यांच्या उपस्थितीत दहिवडी येथे उद्या ते राष्ट्रवादी कॉंग्रेस पक्षामध्ये प्रवेश करणार आहेत. माजी आमदार पाटील यांच्यासोबत न जाता त्यांचे पुतणे सुनील पाटील यांनी महायुतीतील दुसऱ्या पक्षाला जवळ केले आहे. आगामी स्थानिक स्वराज्य संस्थांच्या निवडणुकीच्या निमीत्ताने हा प्रवेश राजकीय वर्तुळात महत्वाचा मानला जात आहे.

नेत्यांमध्ये मनोमिलन घडविण्याचे पाटील बंधूंपुढे चॅलेंज

सातारा जिल्ह्यात राष्ट्रवादी कॉंग्रेसची ताकद वाढवण्यासाठी मंत्री मकरंद पाटील आणि खासदार नितीन पाटील यांनी जोरदार डावपेच आखले आहेत. त्यात त्यांना यशही येत आहे. कऱ्हाड दक्षिणमधील ॲड. आनंदराव ऊर्फ राजाभाऊ पाटील-उंडाळकर हे सुरुवातीपासूनच उपमुख्यमंत्री अजित पवारांसोबत होते. त्यानंतर त्यांचे चुलत बंधू ॲड. उदयसिंह पाटील-उंडाळकर हे राष्ट्रवादी कॉंग्रेसमध्ये आले. ते दोघेही एकाच पक्षात असले तरी त्यांच्यात म्हणावे तेवढे सख्य अजूनही होऊ शकलेले नाही.

आता सुनील पाटील हेही राष्ट्रवादीत येत आहेत. त्यांचे आणि ॲड. उंडाळकरांचेही सख्य नाही. त्यामुळे कराड दक्षिणेत राष्ट्रवादीत प्रवेश होत असले तरी नेत्यांमध्ये मनोमिलन घडविण्याचे मोठे चॅलेंज पाटील बंधूपुढे असणार आहे.