Kolhapur News: बाळूमामाच्या भंडाऱ्यात धक्कादायक भाकणूक! राजकारणात भूकंप, इस्लामिक राष्ट्रे पेटणार?

Kolhapur News: महाराष्ट्र, कर्नाटक आणि आंध्रप्रदेशमधील भक्तांचे श्रद्धास्थान असणाऱ्या कोल्हापूर जिल्ह्यातील भुदरगड तालुक्यातील श्री क्षेत्र आदमापूर येथील संत बाळूमामाचा भंडारा उत्सव पार पडला. या उत्सवाला लाखों भाविकांची गर्दी उसळली होती. तर या यात्रेतील भाकणूक ऐकण्यासाठी पंचक्रोशी राज्यभरातून भाविक आदमापूर येथे दाखल झाले होते. आजवर झालेल्या अनेक भाकणूक जवळपास तेच घडत आले आहे. यंदाही अशीच धडकी भरवणारी भाकणूक झाली. गल्लीपासून ते जगात काय होईल, यांचा सार या भाकणुकीत मांडला. या यात्रेत कृष्णात डोणे महाराजांनी भाकणूक केली.

सध्या जग तिसऱ्या महायुद्याच्या उंबरठ्यावर आहे. देशात महागाई वाढत आहे. या पार्श्वभूमीवर आज पहाटे चार वाजता सुरु झालेला भाकणुकीचा सोहळा सकाळी सहा वाजता संपला. जगातील इस्लामिक राष्ट्रे पेटून उठतील, आपापसात युद्ध करतील. मोठं नुकसान होईल. देशाच्या राजकारणात मोठा गोंधळ होईल, साखर कारखान्याचा मॅनेंजर आनंदात राहील. कोरोनापेक्षा मोठा आजार येईल, शंभर वर्षांनंतर माणूस पृथ्वी सोडेल, कर्नाटक राज्याच्या जलाशयाला मोठे भगदाड पडेल, अशी भाकणूक आज झाली. आदमापूर येथील बाळूमामा भंडारा उत्सवामध्ये त्यांचा भाकणुकीचा कार्यक्रम झाला मराठी वर्षातील ही शेवटची भाकणूक असल्याने या भाकणुकीकडे सर्वांचे लक्ष लागून राहिले होते.

आदमापूर हे गाव प्रतिपंढरपूर होईल, होईल होईल जलप्रलय होईल, कर्नाटकच्या जलाशयाला मोठं भगदाड पडंल, जातीवाद, राजकारण, महाराष्ट्र कर्नाटक सीमा प्रश्न चर्चेत येईल. रेल्वे, विमाने मोठ्या वाहनांचे अपघात होतील, कर्नाटक राज्याचे राजकारण डळमळीत होणार. छोटे पक्ष राज्याच्या राजकारणात मोठे होतील, देशात मात्र कमळ फुलणार, बहीण भावाच्या नात्याला कलंक लागेल, जगात सत्त्य फासावर जाणार, १२ वर्षांची मुलगी भ्रतार मागेल, तरुण पिढी वाईट मार्गाला लागेल, ३५ वर्षांचं म्हातारपण येईल, अशी भाकणूक पार पडली.

कोरिया जगासाठी घातक ठरतील, चीन भारतावर आक्रमण करेल. भारत पाकिस्तानमध्ये मोठे युद्ध होईल. तिसऱ्या महायुद्धाचा भडका उडेल. भारतीय सैनिक सीमेवर लढत राहतील. पाकिस्तानचा चौथा हिस्सा कोणी काबीज करेल. राजकीय नेते मोठमोठ्या घोटाळ्यात अडकून पडतील, तुरुंगात जातील. महागाईचा भस्मासुर वाढेल. जनता हैरान होईल. भाववाढीने जगणं मुश्किल होईल.

मेघ राजा ताळतंत्र सोडेल, सुनामी वादळ होईल. मोठं नुकसान होईल भूकंप होतील. जनतेला नुकसानीला सामना करावा लागेल. जंगलातले प्राणी पक्षी गावात येतील मनुष्य जंगलात राहायला जाईल. बारा कोसावर दिवा दिसेल. गाव बाजार येईल आंतरराष्ट्रीय बाजारपेठा तेजी मंदीत राहतील. हिंदू धर्माला चांगले दिवस येतील. जगातील अनेक देश हिंदू धर्माची स्थापना करतील. भारत देश हिंदुराष्ट्र होईल, भारत मातेचा जयजयकार करा मी भारत मातेच्या रक्षणासाठी सदैव उभा राहीन. पुण्यापेक्षा पाप वाढला आहे. मानवाला अठरा प्रकारचे आजार पडते. विज्ञानाची प्रगती माणसासाठी घातक ठरेल. मानवाचे आयुष्य कमी होईल बारा वर्षाची मुलगी आई बनेल.