Phaltan Doctor Case : फलटण महिला डॉक्टर प्रकरणात सर्वात मोठी कारवाई; निलंबनानंतर पोलिस खात्याचा PSI गोपाळ बदनेला आणखी एक दणका

Satara News : सातारा जिल्ह्यातील फलटण उपजिल्हा रुग्णालयात वैद्यकीय अधिकारी म्हणून ड्युटीवर असलेल्या डॉक्टर तरुणीच्या आत्महत्या प्रकरणानं संपूर्ण राज्यात खळबळ उडवली आहे. या प्रकरणात रोज नवे खुलासे समोर येत आहे. अशातच डॉक्टर महिला आत्महत्येप्रकरणात मोठी अपडेट समोर आली आहे.

मुख्यमंत्री देवेंद्र फडणवीसांनी एकीकडे डॉक्टर तरुणीच्या आत्महत्येनंतर राजकीय वातावरण तापले असताना या प्रकरणात एसआयटी चौकशी स्थापन करण्याचा निर्णय घेतला होता. धडाकेबाज महिला आयपीएस अधिकारी तेजस्वी सातपुते यांच्या नेतृत्वात ही चौकशी होत आहे. याचदरम्यान, फलटण महिला डॉक्टर आत्महत्या प्रकरणातील सुसाईड नोटमध्ये नाव समोर आल्यानंतर पोलिस खात्याने पोलीस उपनिरीक्षक गोपाळ बदनेवर सर्वात मोठी कारवाई केली आहे.

फलटण पोलीस ठाण्यातील निलंबित PSI गोपाळ बदनेला पोलीस सेवेतून बडतर्फ करण्यात आलं आहे. विशेष पोलीस महानिरीक्षक सुनील फुलारी यांनी बदनेला सेवेतून बडतर्फ करत असल्याचे आदेश काढले आहेत.

पीएसआय गोपाळ बदने सध्या फलटण महिला डॉक्टर आत्महत्या प्रकरणात न्यायालयीन कोठडीत आहे. पोलिस सेवेतून त्याला बडतर्फ करताना त्याच्यावर पोलिस दलाची प्रतिमा मलिन केल्याचा ठपका ठेवण्यात आला आहे.

गोपाळ बदने हा दोन वर्षांपासून फलटण पोलीस ठाण्यात कार्यरत असून तो यापूर्वी तो फलटणमधीलच बरड पोलीस स्टेशनमध्ये सेवेत होता.बदने हा मूळचा बीड जिल्ह्यातील परळी तालुक्यातील चांदापूर गावचा असल्याची प्राथमिक माहिती आहे.

फलटण महिला डॉक्टर आत्महत्या प्रकरणातील सुसाईड नोटमध्ये नाव समोर आल्यानंतर PSI गोपाल बदनेबाबत अनेक धक्कादायक गोष्टी बाहेर आल्या होत्या. त्याने मृत महिला डॉक्टरलाच नव्हे तर इतर महिलांनाही त्रास दिल्याचं पोलिस तपासात समोर आलं होतं. तसेच त्याच्यावर छेडछाडी, महिलांना डोळा मारणे अशा अनेक संतापजनक घटना समोर आल्या होत्या.

संबंधित डॉक्टर महिलेनं गळफास घेऊन स्वतःचं जीवन संपवलं. यावेळी तिच्या हातावर पेनानं सुसाईड नोट लिहिल्याचं देखील आढळून आलं होतं. यामध्ये पीएसआय गोपाळ बदने आणि प्रशांत बनकर यांची नाव घेतली होती. यामध्ये आरोपींनी आपला मानसिक आणि शाररिक छळ केल्याचा गंभीर आरोप तिनं केला होता.

याप्रकरणी आधी बनकरला पोलिसांनी ताब्यात घेतलं नंतर बदने हा दोन दिवसांनी फलटण पोलीस ठाण्यात सरेंडर झाला होता. पण त्यावेळी त्याच्या फोन त्याच्यासोबत नव्हता. पण आता पोलिसांना बदनेचा फोनही हाती लागला आहे. बदनेच्या नातेवाईकांनीच त्याचा फोन पोलिसांनी आणून दिल्याचं सांगितलं जात आहे.

फलटणमधील ज्या हॉटेलमध्ये डॉक्टर महिलेनं स्वतःच जीवन संपवलं, त्या महिलेचं हॉटेलमधलं सीसीटीव्ही फुटेज समोर आलं आहे. त्याचबरोबर या मृत्यू प्रकरणातील प्रमुख संशयित आरोपी असलेल्या पीएसआय बदने याचा मोबाईलही आता पोलिसांच्या हाती आला आहे. त्यामुळं आता सीसीटीव्ही फुटेज आणि आरोपीचा मोबाईलमधील डेटा यावरुन प्रकरणात आणखी धक्कादायक खुलासे होण्याची शक्यता आहे. याचदरम्यान,पीएसआय बदनेवर मोठी कारवाई करण्यात आली आहे.