Maharashtra Politic's : वर्धापनदिनीच शरद पवारांच्या राष्ट्रवादीला मोठे धक्के; बालेकिल्ल्यातील दोन युवा शिलेदार भाजपने फोडले

Mumbai, 10 June : राष्ट्रवादी काँग्रेस शरदचंद्र पवार पक्षाला वर्धापनदिनीच भारतीय जनता पक्षाने मोठे धक्के दिले आहेत. ज्येष्ठ नेते शरद पवारांचा पक्ष एकीकडे पुण्यात वर्धापनदिन साजरा करत असताना मुंबईत भाजपने पवारांच्या दोन शिलेदारांना आपल्या पक्षात प्रवेश दिला आहे. विशेष म्हणजे पवारांचा बालेकिल्ला असलेल्या पश्चिम महाराष्ट्रातच भाजपने हे पक्षप्रवेशाचे ऑपरेशन केले आहे, त्यामुळे या दोन नेत्यांच्या भाजप प्रवेशाच्या ‘टायमिंग’ची चर्चा रंगली आहे.

पश्चिम महाराष्ट्र हा शरद पवार (Sharad Pawar) यांच्या पक्षाचा एकेकाळी बालेकिल्ला होता. राष्ट्रवादी काँग्रेस पक्षाचे सर्वाधिक आमदार आणि खासदार ह्याच भागातून निवडून यायचे. स्थानिक स्वराज्य संस्थांच्या आगामी निवडणुकीच्या पार्श्वभूमीवर भाजपने नेमके पश्चिम महाराष्ट्रावरच लक्ष्य केंद्रीत केल आहे. त्यातही पवारांचा पक्ष टार्गेट असणार आहे, हे आता उघड आहे. या दोन युवा नेत्यांनी आपल्या समर्थकांसह भाजपमध्ये प्रवेश केल्याने स्थानिक स्वराज्य संस्थांच्या निवडणकीत त्याचा पवारांच्या राष्ट्रवादीला फटका बसू शकतो

सातारा जिल्ह्यातील पाटणचे नेते विक्रमसिंह पाटणकर यांचे चिरंजीव सत्यजितसिंह पाटणकर (Satyajitsinh Patankar) यांनी आज मुंबईत भारतीय जनता पक्षात प्रवेश केला. प्रदेश कार्यालयात झालेल्या समारंभाला प्रदेश कार्यकारी अध्यक्ष रवींद्र चव्हाण आणि उच्च व तंत्रशिक्षण मंत्री चंद्रकांत पाटील, खासदार उदयनराजे भोसले, आमदार अतुल भोसले यांची उपस्थिती होती.

सत्यजितसिंह पाटणकर यांच्या भाजप (BJP) प्रवेशाची चर्चा गेल्या काही दिवसांपासून रंगली हेाती. विशेषतः विधानसभा निवडणुकीपासून ते भाजपच्या जवळ गेले होते. त्यासाठी खासदार उदयनराजे भोसले आणि सार्वजनिक बांधकाम मंत्री शिवेंद्रराजे भोसले यांनी विशेष प्रयत्न केले आहेत. मागील पंधरा दिवसांपूर्वी सत्यजितसिंह पाटणकर यांनी मेळावा घेऊन कार्यकर्त्यांच्या भावना जाणून घेतल्या होत्या, त्यावेळी बहुतांश कार्यकर्त्यांनी पाटणकर यांना भाजपमध्ये प्रवेश करण्याचा आग्रह धरला होता.

विशेषतः ज्येष्ठ नेते विक्रमसिंह पाटणकर यांनी आपली संपूर्ण हयात शरद पवार यांना साथ देण्यात घालवली होती, त्यामुळे ते पवारांना सोडतील, असा प्रश्न होता. मात्र विधानसभा निवडणुकीच्या वेळी पाटण मतदारसंघ शिवसेना उद्धव बाळासाहेब ठाकरे पक्षाला सोडल्याने पाटणकर हे दुखावले होते. त्यावेळी सत्यजितसिंह पाटणकर यांनी विधानसभा निवडणूक लढवत दुसऱ्या क्रमांकाची मते घेतली होती. त्यामुळे विक्रमसिंह पाटणकर यांनीही सत्यजित यांच्या भाजप प्रवेशाला होकार दर्शविला होता.

दरम्यान, सांगली जिल्ह्यातील विट्याचे माजी आमदार सदाशिवराव पाटील यांचे चिरंजीव वैभव पाटील यांनीही भारतीय जनता पक्षात प्रवेश केला. उच्च व तंत्रशिक्षण मंत्री चंद्रकांत पाटील, भाजपचे कार्यकारी प्रदेशाध्यक्ष रवींद्र चव्हाण यांनी वैभव पाटील यांचे स्वागत केले. पाटील यांच्या प्रवेशासाठी चंद्रकांतदादांनी केलेल्या खेळ्या यशस्वी ठरल्या आहेत.

वैभव पाटील यांनी राष्ट्रवादी काँग्रेस शरदचंद्र पवार पक्षाकडून विधानसभेची निवडणूक लढवली होती. त्यात त्यांचा पराभव झाला. त्यानंतर मात्र भाजप नेत्यांकडून त्यांना प्रवेशाबाबत निमंत्रण देण्यात येत होते. सदाशिवभाऊंनी आतापर्यंत कायम पवारांची पाठराखण केली आहे. मात्र, त्यांच्या चिरंजीवाने घेतलेल्या निर्णयामुळे सांगली शरद पवारांच्या राष्ट्रवादीला मोठा धक्का मानला जात आहे.