Mahayuti News : युतीसाठी आम्ही कोणाच्याही मागे जाणार नाही; शिंदेंच्या मंत्र्याने भाजपला सुनावले

Satara, 22 February : आगामी स्थानिक स्वराज्य संस्थांच्या निवडणुकीच्या अनुषंगाने महायुतीमध्ये खडाखडी सुरू झाली आहे. महाविकास आघाडीच्या विरोधात एकत्र लढायचे की स्वतंत्रपणे स्वबळावर निवडणूक लढवायची यावरून सध्या महायुतीमध्ये वाक्‌युद्ध रंगले आहे. सातारा जिल्ह्यात भारतीय जनता पक्षाची ताकद वाढली आहे, त्यामुळे स्थानिक स्वराज्य संस्थांच्या निवडणुका भाजप स्वबळावर लढवेल, असे पक्षाचे जिल्हाध्यक्ष धैर्यशील कदम यांनी सांगितले. त्यावर शिवसेनेचे मंत्री शंभूराज देसाई यांनीही पलटवार करत ‘आम्ही कोणालाही जबरदस्ती करणार नाही, आम्हीही युतीसाठी कोणाच्या मागे लागणार नाही,’ असे देसाई यांनी भाजपला सुनावले आहे.

आगामी काळात स्थानिक स्वराज्य संस्थांच्या निवडणुका (Local Body Election) जाहीर होण्याची शक्यता आहे. राज्यात त्याचे पडघम वाजायला सुरुवात झाली आहे. महायुती विरुद्ध महाविकास आघाडी असा सामना रंगण्याऐवजी सत्ताधारी महायुतीमध्ये निवडणूक होण्याची शक्यता सध्याच्या स्थितीवरून दिसून येत आहे. तशी जाहीर विधाने महायुतीच्या नेत्यांकडून होताना दिसत आहेत. ती अगदी जिल्हापातळीपर्यंत पोचल्याचे दिसून येत आहे.

भाजपचे सातारा (Satara) जिल्हाध्यक्ष धैर्यशील कदम यांनी जिल्ह्यात पक्षाची ताकद वाढली आहे. आतापर्यंत सातारा जिल्ह्यात तीन लाख २० हजार सदस्य नोंदणी झाली आहे. राष्ट्रवादी काँग्रेसचा बालेकिल्ला आता भारतीय जनता पक्षाचा बोलकिल्ला बनला आहे. त्यामुळे स्थानिक स्वराज्य संस्थांच्या आगामी निवडणुका भाजप स्वबळावर लढवेल, असे कदम यांनी स्पष्ट केले आहे.

स्थानिक स्वराज्य संस्थांच्या निवडणुकांसह इतर सर्व निवडणुका भाजप सातारा जिल्ह्यात स्वबळावर निवडणूक लढविणार आहे, असे धैर्यशील कदम यांनी स्पष्ट केले आहे. त्यामुळे महायुतीमध्ये साताऱ्यात वादाला तोंड फुटले आहे. महायुतीमधील तीनही पक्ष स्वबळावर निवडणुका लढविणार की महायुतीमधून एकत्र निवडणूक लढविणार, याकडे संपूर्ण राज्याचे लक्ष असणार आहे.

याबाबत शिवसेनेचे पाटणचे नेते आणि मंत्री शंभूराज देसाई यांनी भाजपच्या स्वबळावर निवडणुका लढविण्याच्या घोषणेला प्रत्युत्तर दिले आहे. भाजप, शिवसेना आणि राष्ट्रवादी काँग्रेस या तीन पक्षाची महायुती राज्यात सत्तेवर आहे. स्थानिक स्वराज्य संस्थांच्या निवडणुका महायुती म्हणून एकत्र लढवावी, असे आमचे म्हणणे आहे. मात्र, त्यासाठी आम्ही कोणालाही जबरदस्ती करणार नाही आणि युतीसाठी आम्ही कोणाच्या मागेही जाणार नाही, असे स्पष्ट केले आहे.

जिल्हास्तरावर महायुती व्हावी, अशी आमची इच्छा आहे. पण भाजपला युती नको असेल तर आम्हीही कोणाच्या मागे जाणार नाही. आमचीही स्वबळावर निवडणूक लढविण्याची तयारी आहे, असेही शंभूराज देसाई यांनी स्पष्ट केले.