Shivsena UBT Politics: भाजपच्या 100 प्लसच्या मनसुब्याला ठाकरे बंधू लावणार सुरूंग? नाशिकला उद्या संयुक्त सभा घेत देणार थेट आव्हान

News: नाशिक महापालिका निवडणुकीत आता रंग भरू लागले आहेत. यामध्ये भाजपच्या 100 प्लस घोषणेला सहकारी पक्षच आव्हान देत आहेत. आता त्यात ठाकरे बंधूही मैदानात उतरणार आहेत. नाशिक महापालिका निवडणुकीसाठी महायुतीचे जागावाटप फसले. त्यामुळे भाजपच्या 100 प्लस या महत्त्वाकांक्षी उद्दिष्टाला पहिल्यांदा धक्का बसला आहे. एकनाथ शिंदे यांची शिवसेना त्या दृष्टीने कामाला लागली आहे. आता उद्या नाशिकच्या महापालिका निवडणुकीच्या प्रचारात ठाकरे बंधू संयुक्त सभेने बार उडवणार आहेत.

शिवसेना पक्षप्रमुख उद्धव ठाकरे (Uddhav Thackeray) आणि मनसे पक्षप्रमुख राज ठाकरे यांची संयुक्त सभा उद्या नाशिकला होत आहेत. शिवसेना आणि मनसे महापालिका निवडणुकीत एकत्र आले आहेत. त्यानंतर होणारी ही पहिलीच सभा आहे. त्यामुळे या सभेकडे अनेकांचे लक्ष लागले आहे. मावळत्या महापालिकेत शिवसेना उद्धव ठाकरे पक्षाचे 35 नगरसेवक होते. यातील बहुतांश नगरसेवक शिवसेना एकनाथ शिंदे पक्ष आणि भाजपने विविध दबाव तंत्राने फोडले. या पार्श्वभूमीवर प्रमुख पदाधिकाऱ्यांसह नगरसेवकांचे पक्षांतर झाले.

या पार्श्वभूमीवर भाजपने (BJP) जलसंपदा मंत्री गिरीश महाजन यांच्या हाती निवडणुकीची सर्व सूत्रे दिली आहेत. मंत्री महाजन यांनी नाशिक शहरासाठी भाजपचा जाहीरनामा प्रसिद्ध केला. यामध्ये आगामी सिंहस्थ कुंभमेळ्यासह विविध विकास कामांच्या घोषणांचा पाऊस पाडला आहे. दुसरीकडे भाजपच्या 100 प्लसला शिवसेना एकनाथ शिंदे या सहकारी पक्षानेच आव्हान दिले आहे. पक्षाने थेट घरोघर मतदारांना आकर्षित करण्यासाठी विविध प्रयोग करीत भाजपपुढे मोठे आव्हान निर्माण केले आहे. महायुतीच्या या सत्ताधारी पक्षांतच संघर्ष सुरू आहे.

या पार्श्वभूमीवर उद्धव आणि राज ठाकरे उद्या नाशिकला येत आहेत. शिवसेना उद्धव ठाकरे पक्ष आणि मनसेने महायुती पुढे आव्हान निर्माण करण्याचा प्रयत्न केला आहे. त्यामुळे या सभेला शहरातील नागरिकांचे प्रतिस्पर्धी उमेदवारांनी महत्व दिले आहे. उद्याच्या सभेत कोण काय बोलतो? त्याचा काय प्रभाव पडतो? याची भाजपसह सत्ताधारी महायुतीला उत्सुकता लागली आहे.

ऐन निवडणुकीच्या तोंडावर आयाराम आणि गयाराम यांना सत्ताधारी महायुतीने महत्त्व दिले आहे. शहरात मोठ्या प्रमाणावर गुन्हेगारी वाढलेली आहे. त्यात भाजपच्या काही नगरसेवकांना जेलची वारी घडली आहे. या पार्श्वभूमीवर नाशिकमधील मतदारांच्या मनातील भावनांना ठाकरे बंधू कसा हात घालतात? हा उत्सुकतेचा प्रश्न आहे.