Raj Thackeray Nashik Tour : नरेंद्र मोदी, उद्धव ठाकरेंनी जे केले ते राज ठाकरेंनी टाळले!

Nashik News : महाराष्ट्र नवनिर्माण सेनेचे प्रमुख राज ठाकरे आपला नाशिकचा दौरा पूर्ण करून मुंबईला परतले. नाशिकच्या दौऱ्यात ते बहुचर्चित काळाराम मंदिराला भेट देतील, अशी चर्चा होती. मात्र, राज ठाकरे यांनी काळाराम मंदिरात जाऊन दर्शन घेणे टाळले. (Raj Thackeray avoid Nashik KalaRam Mandir visit)

गेले महिनाभर अयोध्येतील श्रीराम मंदिराचा प्राणप्रतिष्ठा सोहळा राजकीयदृष्ट्या विशेष चर्चेत आहे. पंतप्रधान नरेंद्र मोदी यांनी अयोध्येत प्राणप्रतिष्ठा सोहळ्याला हजेरी लावली. त्या सोहळ्याचे उद्दिष्ट आणि चर्चा राजकीयदृष्ट्या महत्त्वाची ठरली. तत्पूर्वी नरेंद्र मोदी यांनी नाशिकच्या दौऱ्यावर आल्यानंतर काळाराम मंदिरात जाऊन प्रभू श्री रामांचे दर्शन घेतले होते. (Raj Thackeray Nashik Tour)

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

पंतप्रधान मोदी यांनी अयोध्या येथील राम मंदिरात प्राणप्रतिष्ठा सोहळा केल्यानंतर खरे हिंदुत्ववादी कोण या प्रश्नावरून शिवसेना आणि भाजप यांच्यामध्ये जोरदार शब्दबाण सोडण्यात येत होते. त्याला उत्तर म्हणून शिवसेना पक्षप्रमुख उद्धव ठाकरे यांनी नाशिक येथे श्री काळाराम मंदिरात जाऊन दर्शन घेतले होते. गोदावरी आरती देखील केली होती.

या पार्श्वभूमीवर मनसेप्रमुख राज ठाकरे यांचा नाशिक दौरा झाला. त्यामुळे राज ठाकरे देखील नाशिकच्या काळाराम मंदिरात जाऊन दर्शन घेतील अशी अपेक्षा होती. यासंदर्भात पक्षाच्या पदाधिकाऱ्यांनी देखील राज ठाकरे यांच्याशी चर्चा केल्याचे कळते. मात्र जे पंतप्रधान मोदी, उद्धव ठाकरे यांनी केले, त्याचे अनुकरण करणे राज ठाकरे यांनी टाळले. राज ठाकरे हे एक दिवस आधीच आपला दौरा आटपून मुंबईला रवाना झाले आहेत.

मनसेच्या स्थानिक पदाधिकाऱ्यांनी मात्र अयोध्येत श्रीराम मंदिराची प्राणप्रतिष्ठा झाली, त्याच दिवशी सकाळी कार्यकर्त्यांसह जाऊन श्री काळाराम मंदिरात पूजा केली होती. माजी महापौर अशोक मुर्तडक, अनिल मटाले, शहराध्यक्ष कोंबडे, बंटी कोरडे, अनंत सूर्यवंशी आदींनी या कार्यक्रमाचे आयोजन केले होते. अयोध्येतील प्राणप्रतिष्ठा सोहळ्यानंतर चर्चेत आलेल्या नाशिकच्या काळाराम मंदिरात राज ठाकरे गेले नाहीत. याची चर्चा त्यांच्या दौऱ्यानंतरही सुरू आहे.

Edited By : Vijay Dudhale