Buldhana Hospital Fire : केंद्रीय राज्य आरोग्य मंत्र्यांच्या जिल्ह्यातच आरोग्य यंत्रणा व्हेंटिलेटरवर; ग्रामीण रुग्णालयाला आग लागल्याने एकाचा मृत्यू

Buldhana News : राज्यातील आरोग्य यंत्रणा सक्षम करण्याचे प्रयत्न यंत्रणेकडून सुरु आहेत. त्यासाठी आरोग्य यंत्रणा प्रयत्नशील आहे. त्यातच केंद्रीय आरोग्यमंत्री प्रतापराव जाधव यांच्या बुलढाणा जिल्ह्यातील आरोग्य यंत्रणा गेल्या काही दिवसापासून व्हेंटिलेटरवर असल्याचे दिसत आहे. बुलढाणा जिल्ह्यातच एक धक्कादायक घटना घडली. येथील लोणार ग्रामीण रुग्णालयाला भीषण आग लागली. या दुर्घटनेमध्ये एका रुग्णाचा होरपळून मृत्यू झाला. त्यामुळे या प्रकारानंतर यंत्रणा खडबडून जागी झाली आहे.

या रुग्णालयात ही आग का आणि कशामुळे लागली हे अद्याप कळू शकले नाही. सध्या पोलीस या सर्व प्रकरणाचा तपास करत आहे. मात्र, केंद्रीय आरोग्य मंत्री प्रतापराव जाधव (Prataprao Jadhav) यांच्याच जिल्ह्यातील रुग्णालयात इतकी मोठी घटना घडल्याने नागरीकातून संताप व्यक्त केला जात आहे.

ही घटना केंद्रीय आरोग्य मंत्री प्रतापराव जाधव यांच्या गावापासून अवघ्या काही किलोमीटरवर असलेल्या लोणार तालुक्यात घडली. 22 डिसेंबरला दुपारी लोणार बसस्थानकावर एक मनोरुग्ण अत्यावस्थेत आढळून आला होता. हरिभाऊ रोकडे अशी या मनोरुग्णाची ओळख पटली होती. अत्यावस्थेत त्यांना तातडीने लोणार येथील जिल्हा रुग्णालयात आणण्यात आले होते.

लोणार येथील जिल्हा रुग्णालयातील जनरल वार्डमध्ये 22 डिसेंबरला रात्री आग लागली होती. या आगीत एका रुग्णाचा मृत्यू झाला. हरिभाऊ बाप्पूजी रोकडे असे मृत रुग्णाचे नाव आहे. रोकडे हे पैठण येथील रहिवासी होते. त्यांना उपचारासाठी लोणार ग्रामीण रुग्णालयात दाखल करण्यात आले होते. मात्र, रुग्णालयात 22 डिसेंबरला लागलेल्या आगीत होरपळून त्यांचा मृत्यू झाला.

रोकडे यांच्याकडे कुटुंबीयांबद्दल चौकशी केली असता त्यांनी आपल्यासोबत कुणीच नसल्याचे सांगितले. रुग्णालयात दाखल झाल्यानंतर त्यांच्यावर प्राथमिक उपचार करण्यात आले. मात्र, त्यांच्यावर उपचार सुरु असताना रुग्णालयात भीषण आग लागली. या आगीत होरपळल्यामुळे रोकडे यांचा मृत्यू झाला. रुग्णालयात ही आग का आणि कशामुळे लागली हे अद्याप कळू शकले नाही या घटनेचा तपास सध्या पोलीस करत आहेत.