Jayant Patil on Khadse : खडसेंच्या भाजप प्रवेशामागचे जयंत पाटलांनी सांगितले कारण....

Mumbai, 07 April : राष्ट्रवादी काँग्रेसचे आमदार एकनाथ खडसे हे लवकरच भारतीय जनता पक्षात प्रवेश करणार आहेत. भाजप प्रवेशावर खुद्द खडसे यांनीच भाष्य केले आहे. येत्या ९ एप्रिल रोजी ते घरवापसी करणार आहेत. त्याबाबत उलटसुटल चर्चा होताना राष्ट्रवादी काँग्रेस शरदचंद्र पवार पक्षाचे प्रदेशाध्यक्ष जयंत पाटील यांनी खडसेंच्या भाजप प्रवेशामागचे कारण सांगितले आहे.

एकनाथ खडसे (Eknath Khadse) हे येत्या मंगळवारी (ता. 09 एप्रिल) भारतीय जनता पक्षात प्रवेश करणार आहेत. भाजपचे (BJP) राष्ट्रीय अध्यक्ष जे. पी. नड्डा यांच्या उपस्थितीत चंद्रपूरमध्ये हा पक्ष प्रवेशाचा सोहळा होणार असल्याची माहिती आहे. तसेच, भाजपकडून खडसेंवर राज्यपाल पदाची जबाबदारी देणार असल्याचे वृत्त आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

खडसे यांच्या भाजप प्रवेशाबाबत जयंत पाटील (Jayant Patil) म्हणाले, एकनाथ खडसे हे भारतीय जनता पक्षात जाणार आहेत, याची मला अजून माहिती नाही. त्यांना बऱ्याच अडचणी तयार करण्यात आल्या होत्या. एकनाथ खडसे हे गेली काही महिने प्रचंड दबावाखाली वावर आहेत. भाजपमध्ये जाण्यासंदर्भात खडसेंसोबत माझं काही बोलणं झालेलं नाही. पण, त्यांच्याभोवती प्रचंड अडचणी तयार करण्यात आलेल्या होत्या.

भाजपने खडसेंवर जे आरोप केले होते, ते धुण्यासाठी आता वेगळी वाशिंग मशिन आली आहे का. पक्षांतर्गत लोकांनी केलेले आरोप धुवून काढण्यासाठी कोणत्या वॉशिंग मशिनचा वापर करण्यात येणार आहे. खडसेंनी फडणवीसांवर अत्यंत गंभीर आरोप केले होते. लोकांना हळूहळू या गोष्टीचं स्मरण होईल, असा दावा खासदार संजय राऊत यांनी केला.

भारतीय जनता पक्षातील वाद देवेंद्र फडणवीस (Devendra Fadnavis) हे लीलया सोडवतात, असा दावा चंद्रकांत पाटील यांनी केला आहे. दुसरीकडे, काँग्रेसचे प्रदेशाध्यक्ष नाना पटोले यांनी भाजपमध्ये एकनाथ खडसेंचा छळ झाला आहे, त्यामुळे ते भाजपमध्ये जाणार नाहीत. कारण ते स्वाभिमानी नेते आहेत, असं म्हटलं होतं.

एकनाथ खडसे यांच्या भाजप प्रवेशाला कोणाचाही विरोध नाही. देवेंद्र फडणवीस यांचाही विरोध नाही. उलट फडणवीस यांनी एकनाथ खडसे यांना नेहमी मानाचे स्थान दिले आहे. खडसे आमचे नेते होते, त्या काळातही त्यांनी फडणवीस यांना सहकार्य केलेले आहे. आमची केंद्रीय आणि राज्य समिती हे भाजप प्रवेशाचे निर्णय करते, असे भाजपचे प्रदेशाध्यक्ष चंद्रशेखर बावनकुळे यांनी म्हटले आहे.