NCP Hearing : राष्ट्रवादी पक्ष कोणाचा? 15 फेब्रुवारीपर्यंत लागणार निकाल; नार्वेकरांची माहिती

Maharashtra Politics : राष्ट्रवादी काँग्रेस पक्ष आणि आमदार अपात्रता प्रकरणाचा निकाल येत्या १५ फेब्रुवारीपर्यंत देण्याचे निर्देश आज सर्वोच्च न्यायालयाने दिले आहेत, त्यानुसार येत्या १५ फेब्रुवारीच्या आतमध्ये राष्ट्रवादी काँग्रेस पक्ष आणि आमदार अपात्रता प्रकरणाचा अंतिम निर्णय जाहीर केला जाईल, अशी माहिती विधानसभेचे अध्यक्ष ॲड. राहुल नार्वेकर यांनी दिली. (Whose NCP Party? Result due by February 15; Rahul Narwekar)

पक्षांतर बंदी कायदा (शेड्यूल १०) चिकित्सा समितीच्या अध्यक्षपदी ॲड राहुल नार्वेकर यांची नियुक्ती करण्यात आली आहे. त्यानंतर माध्यमांशी बोलताना नार्वेकर यांनी ही माहिती दिली. ते म्हणाले, राष्ट्रवादी काँग्रेस पक्षाच्या याचिकेसंदर्भात आज सुनावणी झाली. दोन्ही बाजूचे पुरावे आज सादर झाले आहेत. या प्रकरणी उद्या आणि परवा अशी दोन दिवस सुनावणी होईल. येत्या ३१ जानेवारीपर्यंत हा मॅटर ‘क्लोज टू ऑर्डर’ होईल. (NCP's Hearing)

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

दरम्यान, विधीमंडळ सचिवालयाने राष्ट्रवादी काँग्रेस पक्षाच्या संदर्भात निर्णय घेण्यासाठी सर्वोच्च न्यायालयात याचिका दाखल केली होती. त्यावर सर्वोच्च न्यायालयाने या प्रकरणाचा निकाल १५ फेब्रुवारीपर्यंत देण्याचे निर्देश दिले आहेत. त्यानुसार येत्या १५ फेब्रुवारीच्या आतमध्ये या प्रकरणाचा अंतिम निर्णय जाहीर केला जाईल, असे नार्वेकर यांनी स्पष्ट केले.

शिवसेनेसंदर्भात मी दिलेल्या निर्णयात कायदेशीरदृष्ट्या काय चुकीचे आहे, हे दाखवून देण्याची धमक ना जितेंद्र आव्हाड यांच्यामध्ये आहे, ना उद्वव ठाकरे दाखवू शकले आहेत. खासदार संजय राऊत यांचा तर विषयच उद्‌भवत नाही, असा टोलाही नार्वेकर यांनी लगावला.

उद्धव ठाकरे यांचे माझ्यावर विशेष प्रेम

ते म्हणाले, शिवसेना पक्षप्रमुख उद्धव ठाकरे यांचे माझ्यावर विशेष प्रेम आहे. त्यावर मी जास्त बोलणार नाही. मात्र, संपूर्ण देशातून महाराष्ट्राच्या विधानसभा अध्यक्षांना पक्षांतर बंदी कायदा (शेड्यूल १०) चिकित्सा समितीच्या अध्यक्षपदी संधी मिळते, ही राज्यासाठी अभिमानाची गोष्ट आहे. त्याबद्दल ठाकरेंनी माझे अभिनंदन करायला हवे होते. मात्र, राज्याच्या अस्मितेबद्दल प्रेम व्यक्त करण्याचा वेगळा अंदाज आहे. पण त्यांनी ज्या शुभेच्छा मला दिल्या, त्याबद्दल त्यांचे आभार मानतो.

ओम बिर्ला यांचे आभार

पक्षांतर बंदी कायदा (शेड्यूल १०) चिकित्सा समितीच्या अध्यक्षपदी निवड केल्याबद्दल मी लोकसभेचे सभापती ओम बिर्ला यांचे आभार मानतो. घटनेच्या दहाव्या परिशिष्टासंदर्भात सुधारणा करण्याची गरज आहे, त्याबाबत नियुक्त करण्यात आलेल्या समितीच्या माध्यमातून ते काम करण्यात येईल आणि दहाव्या परिशिष्ठाला अधिक मजबूत करण्यात येईल, असेही नार्वेकर यांनी नमूद केले.

राजकीय पक्षाकडून यापुढे तरी कार्यवाही होईल

ते म्हणाले, अनेक राजकीय पक्ष नियमांतील तरतुदीकडे दुर्लक्ष करतात. त्याचं महत्व आता असा प्रसंग घडल्यानंतर लोकांना पटायला लागले आहे. एखादा राजकीय पक्ष आणि संघटना चालवताना यासंदर्भातील कायदेशीर तरतुदीची अंमलबजावणी होणे आवश्यक आहे. ती गांभीर्याने घेणे आवश्यक आहे. त्यामुळे राजकीय पक्षाकडून अशी कार्यवाही यापुढे तरी होईल, अशी अपेक्षा आहे.