Parth Pawar Controversy: पार्थ पवार जमीन व्यवहार प्रकरणात खुद्द अजित पवारांनीच लावली चौकशी? म्हणाले, मुख्यमंत्र्यांना...

Parth Pawar Controversy: पुण्यातील कोरेगाव पार्क कथित जमीन गैरव्यवहार प्रकरणाची चौकशी खुद्द राज्याचे उपमुख्यमंत्री आणि पार्थ पवार यांचे वडील अजित पवार यांनीच लावली असल्याचं स्वतः पवारांनी दिलेल्या निवेदनातून समोर आलं आहे. पत्रकारांशी संवाद साधताना त्यांनी याप्रकरणावर सविस्तर भाष्य केलं, आपणंच मुख्यमंत्र्यांशी संपर्क साधल्याचं अजित पवार यांनी म्हटलं आहे.

अजित पवार नेमकं काय म्हणाले?

अजित पवार म्हणाले, "या व्यवहाराची मी माहिती घेतली तसंच याची मोठ्या प्रमाणावर चर्चा सुरु झाल्यानंतर आपल्या राज्याचे मुख्यमंत्री नागपूरला होते, त्यावेळी मी त्यांच्याशी फोनवरुन संपर्क साधला. तसंच मी त्यांना सांगितलं की, जरी माझ्या घरातल्या जवळच्या व्यक्तींशी संबंधित हा विषय असला तरीही तुम्ही राज्याचे प्रमुख आहात, त्यामुळं तुम्हाला जे काही नियमाप्रमाणं करावं लागेल, याची चौकशी करावी लागली, तुम्हाला जर चौकशी समिती नेमायची असेल, जे काही करायचं असेल तर ते करु शकता. कारण एवढ्या मोठ्या राज्याचं तुम्ही नेतृत्व करता ते करत आहात, त्यामुळं माझा त्या गोष्टीला पाठिंबाच राहील.

शेवटी आरोप करणं सोपं असतं पण त्याची वस्तुस्थिती काय आहे? हे जनतेला कळणं देखील तितकंच महत्वाचं असतं. याची माहिती घेतल्यानंतर तुमच्या लक्षात येईल की, या व्यवहारात १ रुपयाही दिला गेला नाही. तरीही यामध्ये मोठ्या मोठ्या गोष्टी, आकडे सांगितले गेले आणि विरोधकांनी पण आम्हाला वेगवेगळ्या पद्धतीनं टार्गेट करण्याचा प्रयत्न केला. पण मला आज संध्याकाळी माहिती कळाली की या व्यवहारात जो काही व्यवहार झालेला होता तो रद्द झालेला आहे, असंही अजित पवार यांनी यावेळी स्पष्ट केलं.

जवळच्या नातेवाईकांचीही चौकशी करा - अजित पवार

अजित पवार पुढे म्हणाले, "मी राज्याचा उपमुख्यमंत्री असल्यामुळं माझ्या कुठल्याही अधिकाऱ्यांना संबंधित 'क्लास वन-क्लास टू आयएएस आयपीएस अधिकारी या सर्व अधिकाऱ्यांना मला सूचना करायची आहे की, इथून पुढेही कुठल्याही प्रकारचं प्रकरण तुमच्या पुढे आलं तर ते नियमाला धरुन नसेल तर दबावाखाली न येता सरळ त्याला काट मारायची. कोणीही माझ्या जवळचा नातेवाईक असो किंवा कोणीही माझ्या नावाचा वापर करुन कोणीही काही केलेलं असेल तर हे मला चालत नाही, चालणार पण नाही.

तसंच मीडियानं दोन दिवस या प्रकरणाच्या सर्व गोष्टी चालवल्या, ही माहिती त्यांना मिळालेली होती शेवटी माध्यमांचं कामच आहे जे आहे ते दाखवणं. तसंच बारामतीमध्ये देखील असे काही प्रकार घडल्याचंही माध्यमांनी दाखवलं, माझं म्हणणं आहे की, ज्यांच्याकडं अशा पद्धतीच्या चुकीच्या गोष्टी झालेल्या असतील त्या सर्व बाबींची चौकशी संबंधित अधिकाऱ्यांनी करावी.