Vasant more promise : पुणे महापालिकेत ठाकरेंचा महापौर झाला तर..,वसंततात्यांनी थेट आईची शपथ घेऊन पुणेकरांना दिला मोठा शब्द

Pune News : स्थानिक स्वराज्य संस्थांच्या निवडणुकीच्या तयारीला सर्वच राजकीय पक्ष लागल्याचे पाहायला मिळत आहेत. प्रत्येक राजकीय पक्षाकडून आगामी निवडणुका जिंकण्याच्या दृष्टिकोनातून रणनीती आखण्यात येत आहे. शिवसेना उद्धव बाळासाहेब ठाकरे पक्षाचे नेते असलेल्या वसंत मोरे यांनी देखील सुरुवातीला पुण्यामध्ये ठाकरे सेनेचाच विरोधी पक्षनेता असेल, असा दावा केला होता. मात्र, आता वसंत मोरे पुणे महापालिकेमध्ये ठाकरे सेनेचा महापौर बसवण्याचे स्वप्न पाहत असल्याचे समोर आले आहे.

आगामी स्थानिक स्वराज्य संस्थांच्या बिगुल आता वाजले असून पुणे महापालिकेची प्रभाग रचना करण्यासाठीच्या सूचना सरकारने महापालिका प्रशासनाला दिल्या आहेत. इकडे प्रशासकीय पातळीवर निवडणुकीच्या कामाला सुरुवात झाली असताना दुसरीकडे राजकीय पक्षांकडून देखील निवडणुकीची तयारी सुरू करण्यात आली आहे. नुकतीच ठाकरेंच्या सेनेकडून महापालिका निवडणुकी संदर्भात महत्त्वाची बैठक घेण्यात आली. प्रत्येक विधानसभानिहाय पदाधिकारी आणि कार्यकर्त्यांच्या भावना वरिष्ठ नेत्यांनी जाणून घेतल्या.

इकडे बैठकांचे सत्र सुरू असताना दुसरीकडे मात्र वसंत मोरे (Vasant More) यांना महापालिकेमध्ये ठाकरे सेनेचा महापौर बसवण्याच्या दृष्टिकोनातून तयारी सुरू केली असल्याचं बोललं जात आहे. यापूर्वी मोरे यांनी पुणे महापालिकेमध्ये ठाकरे सेना ही 50 पेक्षा अधिक जागा जिंकणार आणि ठाकरे सेनेचा विरोधी पक्ष नेता होणार असा दावा केला होता.

त्यानंतर वसंत मोरे यांनी या दाव्यावरती अधिक बोलत आपणच आगामी काळामध्ये आपणच पुणे महापालिकेमध्ये विरोधी पक्ष नेते असून असे देखील सांगितले होते. मात्र सध्या सोशल मीडियावर वसंत मोरे यांनी केलेली पोस्ट व्हाययरल होत आहे. या पोस्टमध्ये वसंत मोरे यांनी चक्क ठाकरे सेनेचा महापौर होण्याचे स्वप्न पहात असल्याचं समोर आला आहे.

पोस्टमध्ये वसंत मोरे म्हणाले महापालिका निवडणुकीचे बिगुल आज वाजले आहे. प्रभाग रचना करण्याचे आदेश राज्य सरकारने दिले आहेत. त्यामुळे आजच्या पहिल्याच दिवशी मी सांगतो की, या पुणे शहरातील जनतेने जर आम्हाला शिवसेना (Shivsena) उद्धव बाळासाहेब ठाकरे पक्षाला भरभरून प्रतिसाद दिला आणि या महानगरपालिकेत जर आमच्या पक्षाचा महापौर झाला तर माझ्या आई शपथ सांगतो. पुणे शहरातील महानगरपालिकेची प्रत्येक शाळा मी कात्रज परिसरात उभ्या केलेल्या शाळेप्रमाणे अशाच पद्धतीने सुसज्ज करून गोरगरिबांच्या मुलांसाठी शिक्षणाच्या अनेक संधी उपलब्ध करून देईल, असे आश्वासन वसंत मोरे यांनी दिले आहे.