Positive News: हातात 'मन में हैं विश्वास' अन् थेट विश्वास नांगरे-पाटलांचा कॉल! विकास खारगेंनी युवकाचं स्वप्नच पूर्ण केलं

सागर निकवाडे

Nandurbar News: कधी कधी आयुष्यात असे काही क्षण येतात, जे फक्त आठवणीत राहत नाहीत तर आयुष्यभरासाठी प्रेरणा बनून जातात. नंदुरबार जिल्ह्यातील वाघाळे गावातील अक्षय गांगुर्डे या युवकासाठी असाच एक अविस्मरणीय क्षण आज घडला.

स्पर्धा परीक्षांची तयारी करणारा अक्षय गावातील अभ्यासिकेत बसून आयपीएस अधिकारी विश्वास नांगरे-पाटील यांचे ''मन में हैं विश्वास' हे पुस्तक वाचत होता. पुस्तकातील प्रत्येक पानासोबत तो स्वतःची स्वप्नेही रंगवत होता. त्याचवेळी महसूल विभागाचे अपर मुख्य सचिव विकास खारगे अभ्यासिकेच्या पाहणीसाठी आले.

पुस्तकात रमलेल्या अक्षयकडे पाहून खारगे यांनी सहज विचारले, "विश्वास नांगरे-पाटील यांच्याशी कधी बोलला आहेस का?" यावर अक्षयने लाजतच उत्तर दिले, "नाही सर, बोलायची भीती वाटते."

अक्षयचे उत्तर ऐकताच विकास खारगे यांनी क्षणाचाही विलंब न लावता मोबाईल काढला आणि थेट विश्वास नांगरे-पाटील यांनाच फोन लावला!

ज्या व्यक्तीला तो आपला आदर्श मानत होता, ज्यांचे पुस्तक हातात घेऊन तो अभ्यास करत होता, त्यांचाच आवाज अचानक फोनवर ऐकू आला. अक्षयचा आनंद शब्दांत मावणारा नव्हता.

मात्र या संवादातील सर्वात खास क्षण अजून यायचा होता.

अक्षयशी बोलताना विश्वास नांगरे-पाटील म्हणाले, "अक्षय, तुझा रोल मॉडेल जरी मी असलो, तरी माझे रोल मॉडेल तुझ्यासमोर उभे असलेले आदरणीय विकास खारगे सर आहेत."

हे शब्द ऐकताच अभ्यासिकेतील वातावरण भारावून गेले. एका युवकाचा आदर्श आणि त्या आदर्शाचा आदर्श एकाच क्षणी त्याच्यासमोर उभा होता. अक्षयसाठी हा क्षण एखाद्या स्वप्नपूर्तीसारखाच होता.

काही मिनिटांचा हा साधा संवाद होता, पण त्याने वाघाळे गावातील अनेक युवकांच्या मनात मोठी प्रेरणा निर्माण केली. मोठी स्वप्ने पाहणाऱ्यांसाठी यशस्वी माणसे किती सहजपणे आधार देऊ शकतात, याचे हे सुंदर उदाहरण ठरले.

कधी कधी एका फोन कॉलची किंमत लाखमोलाची असते. कारण तो फक्त संवाद घडवत नाही, तर एखाद्याच्या स्वप्नांना नवी उंची देऊन जातो. काही मिनिटांच्या संवादाने केवळ अक्षयच नव्हे, तर वाघाळे गावातील प्रत्येक युवकाच्या मनात आत्मविश्वासाची नवी ज्योत पेटवली आहे.