मोदी सरकारचा फंडा! आधी एलपीजी 484 रुपयांनी वाढवला अन् नंतर 105 रुपयांनी कमी केला!

नवी दिल्ली : देशात सध्या महागाईचा भडका उडाला आहे. पेट्रोल (Petrol) आणि डिझेलच्या (Diesel) दरवाढीमुळे नागरिक संकटात सापडले आहेत. अशातच मोदी सरकारने 1 डिसेंबरला हॉटेलवाल्यांना दणका दिला होता. व्यावसायिक वापरासाठीच्या स्वयंपाकाच्या गॅस सिलिंडरच्या (LPG Cylinder) दरात सरकारने मागील 4 महिन्यांत 484 रुपयांची वाढ केली आहे. आता मोदी सरकारने नवीव वर्षात आजपासून हा दर 102.50 रुपयांनी कमी केला आहे.

व्यावसायिक वापराच्या गॅस सिलिंडरच्या 1 नोव्हेंबरला 266 रुपये वाढ करण्यात आली होती. नंतर पुन्हा दरात 1 डिसेंबरला 100 रुपये वाढ करण्यात आली होती. त्यामुळे 19 किलोचा एलपीजी सिलिंडरचा दर दिल्लीत 2 हजार 101 रुपयांवर पोचला होता. आता मोदी सरकारने नवीन वर्षाच्या पहिल्याच दिवशी व्यावसायिक वापराच्या सिलिंडरचा दर 102.50 रुपयांनी कमी केला आहे. यामुळे या सिलिंडरचा नवीन दर 1 हजार 998.50 रुपयांवर आला आहे.

व्यावसायिक एलपीजी सिलिंडरची दरवाढ

1 सप्टेंबर (2020) - 75 रुपये

1 ऑक्टोबर - 43 रुपये

1 नोव्हेंबर -266 रुपये

1 डिसेंबर - 100 रुपये

व्यावसायिक एलपीजी सिलिंडरची दरकपात

6 ऑक्टोबर - 2 रुपये 50 पैसे

1 जानेवारी (2021) - 102.50 रुपये

पेट्रोलियम कंपन्यांनी 6 ऑक्टोबरला घरगुती वापराच्या एलपीजी सिलिंडरचे दर 15 रुपयांनी वाढवले आहेत. त्यामुळे दिल्लीत एलपीजी सिलिंडरचा दर जवळपास 900 रुपयांवर पोचला आहे. एका सिलिंडरसाठी 899.50 रुपये मोजावे लागत आहेत. घरगुती वापराच्या 5 किलोच्या सिलिंडरसाठी 502 रुपये द्यावे लागत आहेत. मुंबईतही सिलिंडरचे हेच दर असतील. देशात 1 सप्टेंबरला गॅस सिलिंडरचे दर 25 रुपयांनी वाढले होते. तसेच 17 ऑगस्टला 25 रुपयांची दरवाढ करण्यात आली होती.

देशात पेट्रोल आणि डिझेलच्या दरवाढीचा भडका उडाला आहे. यामुळे सामान्य नागरिक त्रस्त झाले आहेत. पेट्रोलच्या दरासोबत डिझेलनेही शंभरचा टप्पा ओलांडण्यास सुरवात केली आहे. यातच आता एलपीजी सिलिंडर दरवाढीची भर पडली आहे. चालू वर्षभरात एलपीजी सिलिंडरच्या दरात तब्बल 205 रुपयांची वाढ करण्यात आली आहे. यामुळे सामान्य नागरिकांना बसणाऱ्या महागाईच्या झळा आणखी वाढल्या आहेत.

मोदी सरकार सत्तेत आल्यापासून मागील सात वर्षांत सर्वसामान्यांच्या खिशाला कात्री लावून सरकारने आपली झोळी भरुन घेतली आहे. भाजप सरकारच्या काळात पेट्रोलवरील करात 220 टक्के आणि डिझेलवरील करात 600 टक्के वाढ झाली आहे. केंद्रात पंतप्रधान नरेंद्र मोदी यांच्या नेतृत्वाखाली मे 2014 मध्ये भाजपचे सरकार आले. त्यावेळी केंद्र सरकारचा पेट्रोलवरील प्रतिलिटर कर 10.38 रुपये होता आणि आता तो 32.90 रुपये आहे. मे 2014 मध्ये केंद्र सरकारचा डिझेलवरील प्रतिलिटर कर 4.52 रुपये होता. तो आता 31.80 रुपये आहे. म्हणजे मागील सात वर्षांत पेट्रोलवरील करात 220 टक्के आणि डिझेलवरील करात 600 टक्के वाढ झाली आहे.