बजरंग दलाचा राडा; बॉबी देओलचा शोध अन् प्रकाश झा यांचं तोंड केलंं काळं

भोपाळ : अभिनेता बॉबी देओलची (Bobby Deol) प्रमुख भूमिका असलेल्या 'आश्रम' (Ashram) या वेबसिरीजच्या (Web Series) सेटवर बजरंग दलाच्या (Bajrang Dal) कार्यकर्त्यांनी रविवारी राडा केला. दिग्दर्शक प्रकाश झा (Prakash Jha) यांच्या अंगावर शाई फेकण्यात आली. तसेच सेटवरील काही कर्मचाऱ्यांना मारहाण करण्यात आली असून तोडफोडही झाली आहे. सेटवर कार्यकर्त्यांकडून बॉबी देओलचा शोध घेतला जात होता.

'आश्रम' या वेबसिरीजच्या तिसऱ्या सिझनचे शुटींग भोपाळमध्ये सुरू आहे. बजरंग दलाच्या कार्यकर्त्यांनी या सेटवर अचानक हल्लाबोल केला. प्रकाश झा मुर्दाबाद, बॉबी देओल मुर्दाबाद, जय श्रीराम अशा घोषणा देत कार्यकर्ते सेटवर आले. काहींच्या हातात काठ्याही होत्या. सेटवर जात त्यांनी झा यांच्या अंगावर शाई फेकली. काही कर्मचाऱ्यांना मारहाण केल्याचे व्हिडीओही समोर आले आहेत.

या वेबसिरीजच्या माध्यमातून हिंदूंचा अपमान होत असल्याचा दावा या कार्यकर्त्यांनी केला. वेबसिरीजचे नाव बदलण्याची मागणी त्यांनी केली आहे. झा यांनी हे नाव बदलण्याची तयारी दर्शवल्याचेही बजरंग दलाच्या नेत्याने सांगितले. त्यांनी आश्रम-1, आश्रम-2 सिरीज बनवल्या आणि आता आश्रम-3 चे शुटिंग सुरू आहे. प्रकाश झा यांनी यामध्ये गुरू महिलांचा छळ करत असल्याचे दाखविले आहे. चर्च किंवा मदरशावर असा चित्रपट बनविण्याची हिंमत त्यांच्यात आहे का, असं आव्हान बजरंग दलाचे नेते सुशील सुरहेले यांनी दिले.

आम्ही झा यांना ही सिरीज बनवू देणार आहे. आम्ही फक्त प्रकाश झा यांचा चेहरा काळा केला आहे. आता आम्ही बॉबी देओलला शोधत आहोत. त्याने त्याच्या भावाकडून (सनी देओल) काही शिकायला हवं. त्याच्या भावाने देशभक्तीपर चित्रपट तयार केले आहेत, असंही सुरहेले म्हणाले. मात्र, झा किंवा त्यांच्या टीममधील कुणीही याबाबत तक्रार दिली नसल्याचे पोलिसांचे म्हणणे आहे.

सेटवर गोंधळ घालणाऱ्यांचा शोध घेऊन त्यांना अटक केली जाईल. त्यांनी वाहनांची तोडफोड करत दहशत पसरवण्याचा प्रयत्न केला आहे. आश्रमच्या सदस्यांना सुरक्षा पुरवली जाईल. असा प्रकार पुन्हा घडणार नाही, याबाबत दक्षता घेतली जाणार असल्याचेही पोलिसांनी सांगितले.