BJP President : भाजप अध्यक्ष निवडीचा मार्ग मोकळा; बिहार निवडणुकीची डेडलाईन संपली, 'ही' नावे चर्चेत

BJP President Update : बिहार विधानसभा निवडणुकीत एनडीएने मोठा विजय मिळवला. नितीश कुमार यांनी १० व्यांदा मुख्यमंत्रि‍पदाची शपथ घेतली आहे. तर, भाजप सर्वात मोठा पक्ष ठरला आहे. दरम्यान, बिहारच्या निकालानंतर भाजपच्या राष्ट्रीय अध्यक्षपद निवडीचा मार्ग मोकळा झाला आहे.

बिहार विधानसभा निवडणुकीच्यानंतर भाजपच्या राष्ट्रीय अध्यक्षाची निवड केली जाईल, असे संरक्षणमंत्री राजनाथ सिंह यांनी सांगितले होते. त्यामुळे नितीश कुमार यांनी मुख्यमंत्रि‍पदाची शपथ घेताच भाजपचा राष्ट्रीय अध्यक्षपदी कोणाची निवड होणार याची चर्चा सुरू झाल्या आहेत.

2020 मध्ये जेपी नड्डा यांची अध्यक्षपदी निवड झाली होती. 2023 मध्ये त्यांचा कार्यकाळ संपला होता. मात्र, लोकसभा निवडणुकीसाठी त्यांच्याकडे अध्यक्षपद कायम ठेवले होते. 2024 च्या लोकसभा निवडणुकीनंतर नड्डा यांना केंद्रीय मंत्रिपद मिळाले मात्र प्रभारी अध्यक्षपद त्यांच्याकडे कायम राहिले. आता दीड वर्षांचा कालावधी लोटला तरी नवीन अध्यक्षाची नियुक्ती करण्यात आली नाही.

'ही' नावे चर्चेत

भाजप अध्यक्षपदासाठी केंद्रीय मंत्री, हरियाणाचे माजी मुख्यमंत्री मनोहरलाल खट्टर, केंद्रीय कृषीमंत्री शिवराजसिंह चौहान, केंद्रीय मंत्री धमेंद्र प्रधान, केंद्रीय मंत्री भूपेंद्र यादव यांची नावे चर्चेत आहेत. तसेच महिला नेत्यांमध्ये अर्थमंत्री निर्मला सितारामण, वनाथी श्रीनिवासन, माजी मंत्री डी पुरंदरेश्वरी यांचे नावे चर्चेत आहेत.

नवे नावं समोर येणार...

केंद्रीय मंत्री पुढील अध्यक्ष होईल, अशी शक्यता वर्तवली जात असताना संघटनेमध्ये काम करणाऱ्याचा अनुभव असलेल्या नेत्याला अध्यक्षपदाची संधी मिळावी, असे संघाच्या नेत्यांची इच्छा असल्याची चर्चा आहे. 2029 ची निवडणूक डोळ्यासमोर ठेऊन संघटनेच्या कामाचा अनुभव आणि संघा सोबत समन्वय ठेवणाऱ्या नेत्याला अध्यक्षपदासाठी प्राधान्य मिळेल, असे देखील सांगितले जात आहे. त्यामुळे चर्चा होणाऱ्या नावांपेक्षा संघटनेत काम करत असलेल्या नेत्याला अध्यक्षपद मिळेल, असे देखील सांगितले जात आहे.