निवडणुकीच्या तोंडावर भाजपनं टाकला डाव अन् बाबा राम रहीम तुरुंगातून बाहेर

चंडीगड : डेरा सच्चा सौदाचा (Dera Sacha Sauda) प्रमुख गुरमीत राम रहीम (Gurmeet Ram Rahim) हा तुरुंगातून बाहेर येणार आहे. हरियानातील भाजप (BJP) सरकारने त्याला 21 दिवसांचा फर्लो रजा मंजूर केली आहे. राम रहीमचे पंजाब आणि उत्तर प्रदेशमध्ये मोठ्या प्रमाणात अनुयायी आहेत. पंजाब आणि उत्तर प्रदेशातील विधानसभा निवडणुका (Assembly Election) डोळ्यासमोर ठेवून भाजपने हा निर्णय घेतल्याची चर्चा आहे.

पंजाब आणि उत्तर प्रदेशात विधानसभा निवडणुकीची रणधुमाळी सुरू आहे. या दोन्ही राज्यात राम रहीमचे मोठ्या प्रमाणात अनुयायी आहेत. त्यामुळे त्याला 21 दिवसांची फर्लो रजा मंजूर करण्यात आली आहे. याचा परिणाम विधानसभा निवडणुकांवर होणार आहे. भाजपने राम रहीमला तुरुंगातून बाहेर काढून मोठी खेळी खेळल्याचे मानले जात आहे. मागील दशकभरापासून राम रहीम हा तुरुंगात आहे. त्यामुळे तो आता तुरुंगातून बाहेर पडून थेट प्रचारात उडी घेण्याची शक्यता आहे.

साध्वींवरील बलात्कार आणि पत्रकाराच्या हत्येप्रकरणी राम रहीमला 20 वर्षांची शिक्षा न्यायालयाने ऑगस्ट 2017 मध्ये सुनावली होती. नंतर 2021 मध्ये त्याला 19 वर्षांपूर्वीच्या खून प्रकरणात केंद्रीय अन्वेषण विभागाच्या (CBI) विशेष न्यायालयाने जन्मठेपेची शिक्षा सुनावली होती. डेरा व्यवस्थापक रणजितसिंग यांच्या खून प्रकरणात राम रहीम आणि चौघांना केंद्रीय विशेष न्यायालयाने दोषी ठरवले होते. राम रहीम 13 लाख रुपये तर इतर चौघांना 50 हजार रूपयांचा दंड ठोठावण्यात आला होता. रणजितसिंग याचा 2002 मध्ये खून करण्यात आला होता.

या प्रकरणात राम रहीमसह डेरा व्यवस्थापक क्रिशन लाल, शूटर जसबीरसिंग आणि सबदिलसिंग यांनाही दोषी ठरवण्यात आले होते. यातील आरोपी इंदर सैन याचा ऑक्टोबर 2020 मध्ये मृत्यू झाला होता. या प्रकरणात राम रहीम आणि चार दोषींना खून आणि गुन्हेगारी कट आखणे या आरोपांखाली दोषी ठरवण्यात आले. तसेच, सबदिल याला शस्त्रास्त्र कायद्यांतर्गत दोषी ठरवण्यात आले आहे, अशी माहिती विशेष सरकारी वकिलांनी दिली. या प्रकरणाची सुनावणी दुसऱ्या न्यायाधीशांकडे वर्ग करावी, अशी याचिका राम रहीमने पंजाब व हरियाना उच्च न्यायालयात करण्यात आली होती. ती उच्च न्यायालयाने फेटाळून लावली होती.

रणजितसिंग हा डेराचा माजी व्यवस्थापक होता. राम रहीम याच्यावर अनेक साध्वींनी बलात्काराचे आरोप केले होते. त्यावेळी काही साध्वींनी राम रहीम हा लैंगिक अत्याचार करीत असल्याचे निनावी पत्र सगळ्यांना पाठवले होते. यामागे रणजितसिंग याचा हात असल्याचा राम रहीमचा संशय होता. त्यामुळे 10 जुलै 2002 रोजी त्याचा खून करण्यात आला होता. यात राम रहीमसह क्रिशन लाल, जसबीरसिंग आणि अवतारसिंग आणि सबदिल हे आरोपी होते. यातील आणखी एक आरोपी इंदर सैन याचा 8 ऑक्टोबर 2020 रोजी मृत्यू झाला होता. रणजितसिंग हा 8 ऑक्टोबर 2020 रोजी त्याच्या वडिलांनी खानपूर कोलियान गावातील शेतात चहा देऊन दुचाकीवरून परतत होता. त्यावेळी 4 जणांनी त्याच्यावर गोळीबार केली आणि ते पळून गेले. यात रणजितसिंग हा ठार झाला. नंतर हल्ला करणारांची ओळख पटली. सबदिल, जसबीर यांच्या यात समावेश होता. यामागील सूत्रधार राम रहीम असल्याचे नंतर तपासात समोर आले होते.